சியோமி நிறுவனத்தின் மூன்றுவித மடிக்கக்கூடிய ஸ்மார்ட்போன் மாடல்கள்

சியோமி நிறுவனம் மூன்று மடிக்கக்கூடிய ஸ்மார்ட்போன் மாடல்களை அறிமுகம் செய்ய இருப்பதாக தகவல் வெளியாகி உள்ளது. இவை மூன்றும் வெவ்வேறு வடிவமைப்புகளை கொண்டிருக்கும் என்றும் இவை அடுத்த ஆண்டு அறிமுகம் செய்யலாம் என்றும் கூறப்படுகிறது.

இதுகுறித்து டிஸ்ப்ளே வடிவமைப்பு வல்லுநரான ரோஸ் யங் வெளியிட்டு இருக்கும் தகவல்களில், சியோமி நிறுவனத்தின் மூன்று மாடல்கள் - வெளிப்புறம் மடிக்கும் தன்மை, உள்புறம் மடிக்கும் தன்மை மற்றும் கிளாம்ஷெல் வடிவமைப்பு கொண்டிருக்கும் என குறிப்பிட்டுள்ளார்.

இதில் வெளிப்புறம் மடிக்கும் தன்மை கொண்ட மாடல் ஹூவாய் மேட் எக்ஸ் போன்று காட்சியளிக்கும் என்றும் இந்த ஸ்மார்ட்போன் 8 இன்ச் டிஸ்ப்ளே கொண்டிருக்கும் என கூறப்படுகிறது. இதற்கு முன்னதாக ரோஸ் யங் ஒப்போ, விவோ மற்றும் சியோமி நிறுவனங்கள் ஒன்றிணைந்து நான்கு மடிக்கக்கூடிய ஸ்மார்ட்போன்களை 2021 ஆண்டு வெளியிடும் என ஏற்கனவே தெரிவித்திருந்தார்.

சமீபத்தில் சியோமி நிறுவனம் மடிக்கக்கூடிய ஸ்மார்ட்போனிற்கான காப்புரிமை கோரி விண்ணப்பித்து இருந்தது. இது குவாட் கேமரா செட்டப் மற்றும் சுழலும் தன்மை கொண்டிருக்கும் என்று கூறப்படுகிறது. சியோமி நிறுவனம் மூன்றுவித மடிக்கக்கூடிய ஸ்மார்ட்போன் மாடல்களை அறிமுகம் செய்யலாம்.