ஜெய் ஸ்ரீராம்...குஷ்புவின் டுவீட்டால் மீண்டும் பரபரப்பு

நடிகையும் காங்கிரஸ் கட்சியின் செய்தி தொடர்பாளருமான குஷ்பு கடந்த சில நாட்களாக பாஜகவுக்கு ஆதரவாக கருத்துக்களை பதிவு செய்வதாக குற்றச்சாட்டு எழுந்துள்ளது. இதனை அடுத்து தமிழக காங்கிரஸ் கட்சித் தலைவர்கள் சிலர் குஷ்புவுக்கு மறைமுகமாகவும், நேரடியாகவும் கண்டனம் தெரிவித்து வருகின்றனர்.

முதலில் மத்திய அரசின் புதிய கல்விக் கொள்கையை பாராட்டி டுவிட் செய்த நடிகை குஷ்பு, அதன்பின் உள்துறை அமைச்சர் அமித்ஷா கொரோனாவால் பாதிக்கப்பட்டபோது அவர் விரைவில் குணமாக வாழ்த்து தெரிவித்தார்

இந்த நிலையில் இன்று அயோத்தியில் ராமர் கோயிலுக்கு அடிக்கல் நாட்டு விழா நடைபெற்ற நிலையில் 'ஜெய் ஸ்ரீராம்' என்று தனது டுவிட்டர் பக்கத்தில் குறிப்பிட்டு ராமர் கோவிலுக்கு தனது வாழ்த்துக்கள் என்றும் தெரிவித்துள்ளார்

தொடர்ச்சியாக நடிகை குஷ்பு பாஜகவுக்கு ஆதரவாக கருத்துக்களுடன் கூடிய டுவிட்டுக்களை பதிவு செய்து வருவதால் அவர் பாஜகவில் விரைவில் இணைவார் என்று வதந்திகள் பரவி வருகிறது. ஏற்கனவே திமுக எம்எல்ஏ கு.க.செல்வம் பாஜகவில் கிட்டத்தட்ட சேர்ந்து விட்டதாக செய்திகள் வெளியாகியுள்ள நிலையில் தற்போது குஷ்புவும் பாஜகவில் சேருவாரா? என்பதை பொறுத்திருந்துதான் பார்க்க வேண்டும்.