தேவை குறைந்ததால் பூக்களின் விலை சரிவு

பவானிசாகர் மற்றும் அதன் அருகே உள்ள பகுத்தம்பாளையம், அக்கரைதத்தப்பள்ளி, கெஞ்சனூர், எரங்காட்டூர், கொத்தமங்கலம் உள்ளிட்ட 50-க்கும் மேற்பட்ட கிராமங்களில் விவசாயிகள் மல்லிகை, சம்பங்கி, முல்லை உள்ளிட்ட பூக்களை சாகுபடி செய்துள்ளனர். நாள்தோறும் இப்பகுதியில் சுமார் 5 டன் பூக்கள் விளைகிறது.

இந்தப் பூக்களை வியாபாரிகள் விவசாயிகளிடமிருந்து நேரடியாக கொள்முதல் செய்து தமிழ்நாட்டின் பல்வேறு பகுதிகளுக்கும் மற்றும் கர்நாடக மாநிலத்திற்கும் அனுப்புகின்றனர். பூக்களில் தேவைக்கேற்ப அதன் விலையில் நாள்தோறும் மாற்றம் ஏற்படுகிறது.

பவானிசாகர் பகுதியில் நேற்று மல்லிகைப்பூ ரூ.1,100-க்கும், முல்லைப்பூ ரூ.310-க்கும், சம்பங்கி ரூ.70-க்கும் வியாபாரிகள் வாங்கி சென்றனர். அதேபோல் நேற்று முன்தினம் மல்லிகைப்பூ ரூ.1,250-க்கும், முல்லைப்பூ ரூ.710-க்கும், சம்பங்கி ரூ.100-க்கும் விற்பனை ஆனது.

பூக்களின் தேவை குறைந்ததால் நேற்று முன்தினத்தை விட நேற்று முல்லைப்பூ ரூ.400-ம், மல்லிகைப்பூ ரூ.150-ம், சம்பங்கி பூ ரூ.30-ம் விலை குறைந்திருந்தது.