சைவப் பிரியர்களுக்கான காளான் 65 செய்வது எப்படி?

காளான் 65 என்பது சைவப் பிரியர்களுக்கான சுவையான உணவாகும். இப்போது நாம் காளான் 65 எப்படி செய்வது என்று பார்க்கலாம்.

தேவையான பொருட்கள்
காளான் – 200 கிராம்
அரிசி மாவு – 100 கிராம்
கார்ன் ப்ளார் – 25 கிராம்
மல்லிப் பொடி – 2 தேக்கரண்டி
கரம் மசாலா பொடி – 2 1/4 தேக்கரண்டி
மிளகாய் வற்றல் பொடி – 2 தேக்கரண்டி
இஞ்சி – ஆட்காட்டி விரல் அளவு
பூண்டு – 5 எண்ணம் (பெரியது)
மஞ்சள் பொடி – தேவையான அளவு
சீரகம் – 1/4 தேக்கரண்டி
மிளகு – 1/4 தேக்கரண்டி
தயிர் – 100 கிராம்
உப்பு – தேவையான அளவு
எண்ணெய் – பொரிக்கத் தேவையான அளவு

செய்முறை
முதலில் காளானை நன்கு கழுவி சிறு துண்டுகளாக்கவும். இஞ்சி மற்றும் வெள்ளைப் பூண்டினை தோல் நீக்கி சுத்தம் செய்யவும். பின் இஞ்சி மற்றும் வெள்ளைப் பூண்டு ஆகியவற்றுடன் சிறிதளவு தயிர் சேர்த்து மிக்ஸியில் விழுதாக அரைத்துக் கொள்ளவும். சீரகம், மிளகு இரண்டையும் தண்ணீர் சேர்க்காமல் பொடித்துக் கொள்ளவும்.வாயகன்ற பாத்திரத்தில் அரிசி மாவு, கார்ன்ப்ளார் மாவு, மல்லிப்பொடி, கரம்மசாலா பொடி, மிளகாய் வற்றல்பொடி, மஞ்சள்பொடி, மிளகுசீரகப் பொடி, தேவையான உப்பு ஆகியவற்றைப் போட்டு கலந்து கொள்ளவும். பொடி வகைகளுடன் இஞ்சி பூண்டு விழுது, தயிர் ஆகியவற்றைச் சேர்க்கவும்.பின் அதனுடன் சிறுதுண்டுகளாக்கிய காளானைச் சேர்த்து ஒரு சேர பிசையவும்.

காளான் கலவை கெட்டியாக இருக்கும். இதனை அரை மணி நேரம் ஊறவிடவும். பின் வாணலியை அடுப்பில் வைத்து எண்ணெய் ஊற்றி சூடாக்கவும்.எண்ணெய் காய்ந்ததும் காளான் கலவை துண்டுகளைப் போட்டு வேக விடவும். காளான் கலவை துண்டுகளைப் போடும் போது அடிக்கடி காளானைக் கிளறி விடவும். எண்ணெய் குமிழி காளானில் அடங்கியதும் காளானை எடுத்து விடவும். சுவையான காளான் 65 தயார்!