மேட்ரிமோனியில் வரன் தேடும்போது எந்தெந்த விஷயங்களில் கவனம் தேவை

நேரில் ஒருவரிடம் சொல்லி வரன் தேடும்போது எந்தந்த விஷயங்களில் கவனமாக இருப்பீர்களோ… அதை விட இன்னும் சில விஷயங்களில் மேட்ரிமோனியில் வரன் தேடும்போது கவனம் தேவை. மேட்ரிமோனியில் வரன் தேடுபவர்கள் கவனிக்க வேண்டிய விஷயங்கள் ஏராளம் இருக்கின்றன. அவற்றில் முதன்மையான 5 விஷயங்கள் உள்ளன.

நிறைய மேட்ரிமோனி இணையதளங்கள் வந்துவிட்டன. அவற்றில் சரியான தகவல்களை அளிக்கும் தளத்தைத் தேர்வு செய்ய வேண்டும். சில மேட்ரிமோனி தளங்களில் பல தகவல்களைக் கேட்கவே மாட்டார்கள். ஓரிரு தகவல்களுக்குப் பிறகு பணம் கட்ட வைப்பதிலேயே குறியாக இருப்பார்கள். அம்மாதிரியான தளங்களைத் தவிர்த்துவிடுங்கள். சிலர் எதிர்பார்ப்பு என மறைமுகமாக வரதட்சணையைக் குறிப்பிட்டிருப்பார்கள். அதுபோன்ற விண்ணப்பங்களை நிராகரியுங்கள்.

உங்களிடம் நிறைய தகவல்களை ஒரு தளம் கேட்டால், அதேபோல பெண் / பையன் வீட்டிலேயும் கேட்டிருப்பார்கள். அதனால், அந்தத் தளங்களில் நீங்கள் தேடும் வரன் குறித்த முழு தகவல்களையும் செக் பண்ணுங்கள். வரன் பதிவு செய்யும்போது போன் அல்லது மொபைல் நம்பர் கேட்பார்கள். நீங்கள் தரும் எண்ணை வைத்திருப்பவர், எப்போது யார் அழைத்தாலும் உடனே எடுத்து பேசுபவராக இருக்க வேண்டும். ரொம்ப பிஸியாக இருப்பவர் எண்ணைக் கொடுக்க வேண்டாம். மணமகன் தேடுகிறீர்கள் எனில், உங்கள் பெண்ணின் எண்ணைக் கொடுப்பது குறித்து அப்பெண்ணுடன் ஆலோசித்துக் கொடுங்கள்.

சிலர் சாதியின் உட்பிரிவிலும் நுட்பமாக வேண்டும் எனக் கேட்பார்கள். அதுதேவைதானா என்பதை ஆலோசித்து முடிவெடுங்கள். ஏனெனில், ரொம்பவும் கெடுபிடியான நபர்களின் உறவுகள் சீக்கிரம் உடைந்துவிடும். என்னதான் ஆன்லைனின் விவரங்களைச் செக் பண்ணினாலும் நேரில் பார்ப்பது, பேசுவது போல ஆகாது. அதனால், நீங்கள் தேர்தெடுத்த பையன் அல்லது பெண் தொடர்பான நபர்களை நேரில் சென்று விசாரிக்க தயக்கம் காட்டாதீர்கள்.

அதை பெண் பார்ப்பது என்பதாக முடிவெடுத்து செல்லாதீர்கள். பொதுவாக விசாரிப்பது என்பதாகவே இருக்கட்டும். ஏனெனில் மேட்ரிமோனி மூலம் பல வரன்கள் வரும். ஒவ்வொருன்றுக்கும் பெண் பார்க்கச் செல்லும் நடைமுறை சரிவராது. நிதானமாக, பொறுமையாக, அவசரம் காட்டாமல் வரன்களைத் தேர்தெடுங்கள்.