தீபாவளிக்கு மாஸ்டர் வெளியீடு இல்லை; தயாரிப்பாளர் அறிவிப்பு

கொரோனா வைரஸ் காரணமாக கடந்த 7 மாதங்களுக்கு மேல் மூடப்பட்டிருந்த திரையரங்குகள் வரும் 10ஆம் தேதி திறக்க உள்ளன. ஏற்கனவே நாடு முழுவதும் திரையரங்குகள் திறந்து விட்ட நிலையில் தற்போது தமிழகத்திலும் திரையரங்குகள் திறக்கப்படுவதால் தளபதி விஜய்யின் 'மாஸ்டர்' உள்பட ஒரு சில திரைப்படங்கள் வெளியாக வாய்ப்பு இருப்பதாக கூறப்பட்டது.

இந்த நிலையில் தற்போது பேட்டியளித்த மாஸ்டர் தயாரிப்பாளர் லலித்குமார், "தீபாவளிக்கு மாஸ்டர் வெளியீடு இல்லை என்று திட்டவட்டமாக கூறியுள்ளார். மேலும் மாஸ்டர் படம் பொங்கலுக்கு வெளியாகுமா? என்பதை கால சூழலை பொறுத்து முடிவு செய்யப்படும் என்றும் லலித்குமார் கூறியுள்ளார்.

மேலும் இந்தியா உள்பட ஒருசில நாடுகளில் மட்டும்தான் திரையரங்குகள் திறக்கப்பட்டுள்ளன. உலகில் இன்னும் பல நாடுகளில் திரையரங்குகள் திறக்கவில்லை.

'மாஸ்டர்' திரைப்படம் உலகம் முழுவதும் வெளியாக வேண்டிய ஒரு பெரிய படம் என்பதால் தான் அந்த படத்தின் ரிலீஸ் தள்ளி போய்க்கொண்டே உள்ளது என்று கோலிவுட் வட்டாரங்கள் கூறுகின்றன. மொத்தத்தில் தீபாவளியை மிஸ் செய்த 'மாஸ்டர்', பொங்கலுக்காவது வரவேண்டும் என்பதே விஜய் ரசிகர்களின் விருப்பமாக உள்ளது.