இந்தியாவில் கொரோனா வைரஸ் தாக்கம் நாளுக்கு நாள் அதிகரித்து கொண்டே வருகிறது. உலகில் வேகமாக வைரஸ் பரவும் நாடுகளில் இந்தியா முதலிடத்தில் உள்ளது. கடந்த மாதம் இந்தியாவில் தினசரி கொரோனா நோய்த்தொற்று ஒரு லட்சத்தை எட்டியது. தற்போது குறையத் தொடங்கி உள்ளது. இருப்பினும், குணமடைந்தவர்களின் எண்ணிக்கை கணிசமாக உயர்ந்து கொண்டே வருகிறது. மேலும் உயிரிழப்பும் கடந்த சில தினங்களாக குறைந்துள்ளது.
இன்று காலை மத்திய சுகாதாரத்துறை வெளியிட்ட தகவலின்படி இந்தியாவில் கொரோனாவால் பாதிக்கப்பட்டவர்களின் எண்ணிக்கை 70 லட்சத்தை தாண்டி உள்ளது. மொத்த பாதிப்பு 70,53,807 ஆக உயர்ந்துள்ளது. கடந்த 24 மணி நேரத்தில் 74,383 பேருக்கு கொரோனா தொற்று உறுதி செய்யப்பட்டுள்ளது. 918 பேர் மரணம் அடைந்துள்ளனர்.
தற்போதுவரை இந்தியாவில் கொரோனா வைரசால் உயிரிழந்தோர் எண்ணிக்கை 1,08,334 ஆக உயர்ந்துள்ளது. கொரோனா பாதிப்பில் இருந்து குணமடைந்தவர்களின் எண்ணிக்கை 60,77,977 ஆக உயர்ந்துள்ளது. நேற்று மட்டும் 89154 பேர் குணமடைந்துள்ளனர். புதிய நோய்த்தொற்று எண்ணிக்கையை விட அதிக நபர்கள் குணமடைந்துள்ளனர்.
இந்நிலையில் நாடு முழுவதிலும் உள்ள பல்வேறு மருத்துவமனைகளில் 8,67,496 பேர் சிகிச்சை பெற்றுவருகின்றனர். உயிரிழப்பு 1.54 சதவீதமாக உள்ளது. குணமடைந்தோர் விகிதம் 86.17 சதவீதமாக உயர்ந்துள்ளது.