- வீடு›
- பொழுதுபோக்கு›
- நடிகர் ரஜினிகாந்த் நலம்பெற கமல்ஹாசன் வாழ்த்து!
நடிகர் ரஜினிகாந்த் நலம்பெற கமல்ஹாசன் வாழ்த்து!
By: Monisha Sat, 26 Dec 2020 09:27:00 AM
மக்கள் நீதி மய்யம் கட்சி தலைவர் கமல்ஹாசன் நடிகர் ரஜினிகாந்த் நலம்பெற வாழ்த்துகள் தெரிவித்து உள்ளார்.
நடிகர் ரஜினிகாந்த் ரத்த அழுத்த பிரச்சனை காரணமாக ஐதராபாத்தில் உள்ள அப்பல்லோ மருத்துவமனையில் அனுமதிக்கப்பட்டுள்ளார். இது தொடர்பாக அப்பல்லோ மருத்துவமனை நிர்வாகம் வெளியிட்டுள்ள அறிக்கையில், கடந்த 22ந்தேதி ரஜினிகாந்துக்கு பரிசோதனை செய்யப்பட்டு அவருக்கு தொற்று இல்லை என்பது தெரிய வந்தது. அவருக்கு கொரோனா அறிகுறிகள் இல்லையென்றாலும் அவரது ரத்த அழுத்த அளவு கடுமையாக ஏறி இறங்கி வருகிறது. மேற்கொண்டு அதற்கான பரிசோதனைக்காக அவர் மருத்துவமனையில் அனுமதிக்கப்பட்டுள்ளார். அவரது இரத்த அழுத்தம் சீராகி, அவர் மருத்துவமனையிலிருந்து வெளியேறும் வரை தீவிரமாக கண்காணிக்கப்பட்டு அவருக்கு சிகிச்சை தரப்படும் என தெரிவிக்கப்பட்டது.
நடிகர் ரஜினிகாந்தின் உடல்நிலை குறித்து தி.மு.க. தலைவர் மு.க.ஸ்டாலின் தொலைபேசியில் விசாரித்தார். தெலுங்கானா கவர்னர் தமிழிசை சவுந்தரராஜன், சகோதரர் ரஜினிகாந்த் விரைவில் பூரணநலம் பெற பிரார்த்திக்கிறேன் என வாழ்த்து கூறியுள்ளார்.
இதேபோன்று தெலுங்கு தேசம் கட்சி தலைவர் சந்திரப்பாபு நாயுடு, நடிகர் பவன் கல்யாண் ஆகியோர் ரஜினிகாந்த் நலம் பெற வாழ்த்து தெரிவித்து உள்ளனர். இந்நிலையில், மக்கள் நீதி மய்யம் கட்சி தலைவர் கமல்ஹாசன் நண்பர் நலம்பெற வாழ்த்துகள் என நடிகர் ரஜினிகாந்துக்கு தனது டுவிட்டரில் வாழ்த்து தெரிவித்து உள்ளார்.