நெல்லை, தூத்துக்குடி, தென்காசி மாவட்டங்களில் கொரோனா பாதிப்பு நிலவரம்

நெல்லை மாவட்டத்தில் கொரோனா எண்ணிக்கை படிப்படியாக அதிகரித்து வந்த போதிலும், அதிகமானோர் குணமடைந்து வீடு திரும்பி வருகிறார்கள். நெல்லை மாநகர பகுதியை சேர்ந்த 8 பேர், புறநகர் மாவட்டத்தை சேர்ந்த 47 பேர் என மொத்தம் 55 பேர் குணமடைந்து நேற்று ஒரே நாளில் ‘டிஸ்சார்ஜ்‘ ஆனார்கள். அவர்கள் ஆம்புலன்ஸ் மூலம் அவரவர் சொந்த ஊர்களுக்கு அனுப்பி வைக்கப்பட்டனர்.

இந்த நிலையில் நெல்லை மாவட்டத்தில் நேற்று மேலும் 3 பேருக்கு கொரோனா தொற்று ஏற்பட்டது. இதில் 2 பேர் உள்ளூரை சேர்ந்தவர்கள், ஒருவர் வெளியூரில் இருந்து வந்தவர் ஆவார். 86 பேர் ஆஸ்பத்திரியில் தொடர் சிகிச்சையில் உள்ளனர்.

தூத்துக்குடி மாவட்டத்தில் நேற்று முன்தினம் வரையிலும் 294 பேர் கொரோனாவால் பாதிக்கப்பட்டு இருந்தனர். நேற்று செய்துங்கநல்லூரைச் சேர்ந்த 3 பேரும், காயல்பட்டினத்தைச் சேர்ந்த ஒருவரும், ஆத்திக்குளத்தை சேர்ந்த 2 பேரும், உமரிக்கோட்டையைச் சேர்ந்த ஒருவரும் ஆக மொத்தம் 7 பேருக்கு கொரோனா தொற்று உறுதி செய்யப்பட்டு உள்ளது.

தூத்துக்குடி மாவட்டத்தில் கொரோனாவால் பாதிக்கப்பட்டவர்களின் எண்ணிக்கை 301 ஆக உயர்ந்து உள்ளது. கொரோனா தொற்றால் பாதிக்கப்பட்ட 8 பேர் நேற்று குணமடைந்து வீடு திரும்பினர். இதனால் இதுவரையில் குணமடைந்து வீடு திரும்பியவர்களின் எண்ணிக்கை 175 ஆக உயர்ந்து உள்ளது. 2 பேர் இறந்து உள்ளனர்.

தென்காசி மாவட்டத்தில் நேற்று மேலும் 2 பேருக்கு கொரோனா தொற்று கண்டறியப்பட்டது. இதையடுத்து அந்த மாவட்டத்தில் கொரோனாவால் பாதிக்கப்பட்டோர் எண்ணிக்கை 96 ஆக உயர்ந்துள்ளது. இதில் 77 பேர் ‘டிஸ்சார்ஜ்‘ ஆகி விட்ட நிலையில், 19 பேர் மட்டும் தென்காசி அரசு ஆஸ்பத்திரியில் சிகிச்சை பெற்று வருகின்றனர்.