வருகிற 12-ந்தேதி நாடு முழுவதும் அனைத்து டோல்கேட்களிலும் கட்டணம் செலுத்தாமல் போராட்டம்

மத்திய அரசு கொண்டு வந்துள்ள 3 புதிய வேளாண் சட்டங்களை வாபஸ் பெற வலியுறுத்தி விவசாயிகள் 15-வது நாளாக இன்று டெல்லியில் முற்றுகை போராட்டத்தில் ஈடுபட்டுள்ளனர்.போராட்டத்தை முடிவுக்கு கொண்டு வர மத்திய அரசு விவசாய சங்க பிரதிநிதிகளுடன் இதுவரை 5 சுற்று பேச்சுவார்த்தை நடத்தி உள்ளது. இதில் எந்த உடன்பாடும் ஏற்படவில்லை. நேற்று மத்திய உள்துறை அமைச்சர் அமித் ஷா பேச்சுவார்த்தை நடத்தினார்.

அப்போது 7 உத்தரவாதங்களை மத்திய அரசு, விவசாயிகளுக்கு அளித்தது. விளை பொருட்களுக்கு குறைந்தபட்ச ஆதாரவிலை தொடரும். விவசாய மண்டிகள் குறைந்த கட்டணத்தில் தொடர்ந்து நடைபெறும். விவசாய பொருள் வர்த்தகர்களை மாநில அரசு பதிவு செய்ய அதிகாரம் வழங்கப்படும் என்பன உட்பட 7 உத்தரவாதங்கள் அளிக்கப்பட்டன.

ஆனால் இதையும் விவசாயிகள் ஏற்றுக்கொள்ளவில்லை. 3 சட்டங்களையும் வாபஸ் வாங்குவதைத் தவிர வேறு எந்த சமாதானத்தையும் ஏற்றுக்கொள்ள மாட்டோம் என்று அறிவித்துவிட்டனர். இத்துடன் போராட்டத்தை மேலும் தீவிரப்படுத்தப் போவதாக அவர்கள் அறிவித்தார்கள். டெல்லிக்கு வரும் அனைத்து சாலைகளையும் முடக்கப் போவதாக அறிவித்தனர். இதன்படி டெல்லி- ஜெய்ப்பூர் சாலை எந்த நேரத்திலும் முடக்கப்படலாம் என்று எதிர்பார்க்கப்படுகிறது.

இத்துடன் 12-ந்தேதி நாடு முழுவதும் அனைத்து டோல்கேட்களிலும் கட்டணம் செலுத்தாமல் செல்வது என்று அறிவித்துள்ளனர். 14-ந் தேதி நாடு தழுவிய போராட்டத்தை நடத்துவது, பா.ஜனதா எம்.பி. எம்.எல்.ஏ.க்கள் மற்றும் தலைவர்களின் அலுவலகம் மற்றும் வீடுகளை முற்றுகையிடுவது என்றும் அறிவித்து இருக்கிறார்கள். டெல்லியை முற்றிலும் முடக்கப்போவதாக அறிவித்திருப்பதால் டெல்லி நகரில் இயல்பு வாழ்க்கை கடுமையாக பாதிக்கும் சூழ்நிலை உருவாகி உள்ளது.