டோக்கியோ: ஜப்பானில் பெரும் குழப்பம்... வடகொரியாவின் ஏவுகணை சோதனை ஜப்பானில் பெரும் குழப்பத்தை ஏற்படுத்தியுள்ளது.
இன்று காலை வடகொரியாவின் ஏவுகணை சோதனை ஜப்பானின் ஹொக்கைடோவில் உள்ள அசஹிகாவாவில் தரையிறங்கியிருக்கலாம். இதையடுத்து, ஹொக்கைடோவில் வசிக்கும் மக்களை உடனடியாக வெளியேறுமாறு ஜப்பான் அரசு வலியுறுத்தியது.
குடியிருப்புகளின் அடித்தளத்தில் சென்று ஒளிந்து கொள்ளுமாறும் மக்களை கேட்டுக் கொண்டது. வடகொரியாவின் ஏவுகணை சோதனை குறித்து தொடர்ந்து விசாரணை நடத்தி வருவதாக ஜப்பான் அரசு தெரிவித்துள்ளது.
இந்நிலையில் வடகொரியா இன்று நடத்திய சோதனை ஜப்பானின் கிழக்கு கடற்கரை பகுதியில் விழுந்ததாக ஊடகங்கள் செய்தி வெளியிட்டுள்ளன. இது ஹொக்கைடோ மக்களிடையே குழப்பத்தை ஏற்படுத்தியது. இதற்கிடையில், ஜப்பான் தனது வெளியேற்ற உத்தரவை திரும்பப் பெற்றுள்ளது.
கடந்த வாரம் வடகொரியா நீருக்கடியில் அணுகுண்டு சோதனை நடத்தியது. உலக நாடுகளின் கடும் எதிர்ப்பையும் மீறி வடகொரியா மீண்டும் நீருக்கடியில் அணுகுண்டு சோதனை நடத்தியது. அதற்கு ஹெய்ல்-2 என்று பெயரிடப்பட்டது. இந்த வகை ஏவுகணைகள் கடலுக்கு அடியில் ஏவப்படும் போது செயற்கை சுனாமி அலைகளை உருவாக்கும் திறன் கொண்டவை.
வடகொரியா மற்றும் ஏவுகணைகள்: கடந்த சில மாதங்களாக கொரிய தீபகற்பத்தில் அமெரிக்கா மற்றும் தென்கொரிய படைகள் ராணுவ பயிற்சிகளை நடத்தி வருகின்றன. மேலும், இரு நாடுகளும் பாரிய இராணுவ பயிற்சிக்கு திட்டமிட்டுள்ளதாக தகவல்கள் தெரிவிக்கின்றன. இந்த நிலையில் வடகொரியா தொடர்ந்து அணு ஆயுத சோதனைகளை நடத்தி வருகிறது என்பதும் குறிப்பிடத்தக்கது.