நடிகர் ரஜினிகாந்த் தான் பணியாற்றிய பேருந்து பணிமனைக்கு திடீரென வருகை

நெல்சன் இயக்கத்தில் நடிகர் ரஜினிகாந்த் நடிப்பில் உருவான ‘ஜெயிலர்’ திரைப்படம் வெற்றிகரமாக திரையரங்குகளில் ஓடிக்கொண்டிருக்கிறது. இதையடுத்து இந்த படம் உலக அளவில் ரூ.530 கோடியைத் தாண்டி வசூலித்து கொண்டு வருகிறது. பட ரிலீஸூக்கு முன்பு நடிகர் ரஜினிகாந்த் இமயமலை சென்றிருந்தார்.

தொடர்ந்து உத்தரபிரதேசம் சென்றிருந்த அவர் முதல்வர் யோகி ஆதித்யநாத்தை சந்தித்து காலில் விழுந்த புகைப்படங்கள் பெரும் வைரலாகின.

இந்த நிலையில் தற்போது பெங்களூருவில் தான் பணியாற்றிய ஜெயநகர் பேருந்து பணிமனைக்கு நடிகர் ரஜினிகாந்த் திடீரென வருகை தந்து உள்ளார். அப்போது அங்கிருந்த பேருந்து நடத்துனர்கள், ஓட்டுனர்கள், பணிமனை ஊழியர்களுடன் கலந்துரையாடி புகைப்படங்களை எடுத்துக்கொண்டார்.

இதனை அடுத்து இது தொடர்பான வீடியோ வைரலாகி கொண்டு வருகிறது. ரஜினி திரையுலகில் நடிகராக அறிமுகமாவதற்கு முன்பு இந்த பணிமனையில் தான் நடத்துனராக பணியாற்றினார். அடுத்து ரஜினி நடிப்பில் ஞானவேல் இயக்கத்தில் உருவாகும் புதிய படத்தின் படப்பிடிப்பில் விரைவில் தொடங்கவுள்ளது.