நடிகர் சூர்யாவை ஓய்வு எடுக்க மருத்துவர்கள் அறிவுறுத்தல்

நடிகர் சூர்யாவின் நடிப்பில் உருவாகும் ‘கங்குவா’ திரைப்படம் பெரும் எதிர்பார்ப்பை ஏற்படுத்தியுள்ளது. சிறுத்தை சிவா இயக்கத்தில் உருவாகும் இந்த படத்தில் நடிகர் சூர்யா 5-க்கும் மேற்பட்ட வேடங்களில் நடித்து வருகிறார். இப்படத்தில் பாலிவுட் நடிகை திஷா பதானி கதாநாயகியாக நடிக்கிறார். மேலும் இந்த படத்தில் யோகி பாபு, கோவை சரளா, நட்ராஜ் உள்ளிட்டோர் முக்கிய கதாபாத்திரங்களில் நடித்து வருகின்றனர். இந்த படத்திற்கு தேவி ஸ்ரீ பிரசாத் இசையமைத்து கொண்டு வருகிறார்.

யூவி கிரியேஷன் மற்றும் ஸ்டுடியோ கிரீன் நிறுவனங்கள் தயாரிக்கிறது. இதையடுத்து இந்த படம் முழுக்க முழுக்க 3டி தொழிற்நுட்பத்தில் உருவாகி கொண்டு வருகிறது. ஃபேண்டஸி கதைக்களத்தில் உருவாகும் இந்த படத்திற்கு ஏராளமான அனிமேஷன் காட்சிகள் இடம்பெற உள்ளது. இபேபடம் 1500 ஆண்டுகளுக்கு முன்பு நடக்கும் கற்பனை கலந்த கதைக்களம் கொண்ட படமாகும். 38 மொழிகளில் கங்குவா படத்தை வெளியிட இருப்பதாக தகவல் வெளியாகியுள்ளது.

இந்த நிலையில், கடந்த 23ம் தேதி கங்குவா திரைப்பட சண்டை காட்சியின் போது ஏற்பட்ட விபத்தில் நடிகர் சூர்யா காயமடைந்தார். சென்னை பூந்தமல்லி அருகே கங்குவா திரைப்பட சண்டை காட்சியின்போது கேமரா அறுந்து சூர்யாவின் தோள்பட்டையில் விழுந்ததாகவும், இதில் அவர் காயமடைந்ததால் உடனடியாக சிகிச்சையளிக்க மருத்துவமனைக்கு அழைத்துச் செல்லப்பட்டதாகவும் தெரிவிக்கப்பட்டது.

இந்த நிலையில், நடிகர் சூர்யாவை 2 வாரங்கள் ஓய்வு எடுக்கும் படி மருத்துவர்கள் அறிவுறுத்தியுள்ளதாக தகவல் ஒன்று வெளியாகியுள்ளது. இதன் காரணமாக நடிகர் சூர்யா தற்போது ஓய்வில் உள்ளார். எனவே இதன் காரணமாக கங்குவா திரைப்படத்தில் சூர்யாவின் காட்சிகளை தவிற மற்ற காட்சிகள் படமாக்கப்பட்டு வருகிறது.