6 ஆண்டுகளுக்கு பிறகு முக சவரம்... நடிகர் கார்த்தி பதிவிட்ட புகைப்படம்

சென்னை: 6 ஆண்டுகளுக்கு பிறகு முக சவரம் செய்துள்ளேன் என்று நடிகர் கார்த்தி புதிய தோற்றத்தில் இருக்கும் புகைப்படத்தை தன் இன்ஸ்டாகிராம் பக்கத்தில் பகிர்ந்துள்ளார்.


நடிகர் கார்த்தி தற்போது மணிரத்னம் இயக்கத்தில் பொன்னியின் செல்வன், மித்ரன் இயக்கத்தில் சர்தார் போன்ற படங்களில் நடித்து முடித்துள்ளார். மேலும் சூர்யா - ஜோதிகா தயாரிப்பில் முத்தையா இயக்கத்தில் கார்த்தி நடித்துள்ள விருமன் படம் வெளியீட்டுக்கு தயாராகியிருக்கிறது.

யுவன் ஷங்கர் ராஜா இசையமைத்துள்ள இந்தப் படத்துக்கு இயக்குநர் ஷங்கரின் மகள் அதிதி ஷங்கர் நாயகியாக அறிமுகமாகியுள்ளார். ஆகஸ்ட் 5 ம் தேதி வெளியாகும் என்று கூறப்பட்ட இந்தப் படத்தின் வெளியீட்டுத் தேதி மாற்றப்பட்டுள்ளதாக கூறப்படுகிறது. விரைவில் புதிய வெளியீட்டுத் தேதி வெளியாகும் என எதிர்பார்க்கலாம்.

இதன் ஒரு பகுதியாக பொன்னியின் செல்வன் வருகிற செப்டம்பர் 30 ஆம் தேதியும், சர்தார் தீபாவளிக்கும் வெளியாகின்றன. இந்த நிலையில் நடிகர் கார்த்தி தனது இன்ஸ்டாகிராம் பக்கத்தில் மீசை தாடியில்லாத புகைப்படம் ஒன்றைப் பகிர்ந்துள்ளார்.


அவரது பதிவில், வழக்கமான ஒன்றிலிருந்து வெளியேறி புதிதாக மாறுவது பயமுறுத்தக் கூடியதுதான். ஆனால் ஒரு முறை நீங்கள் அதனை செய்துவிட்டால் அது அவ்வளவு மோசமானதாக இருக்காது. 6 ஆண்டுகளுக்கு பிறகு முக சவரம் செய்துள்ளேன் என்று குறிப்பிட்டுள்ளார். முன்னதாக மணிரத்னத்தின் காற்று வெளியிடை படத்துக்காக மீசை தாடியில்லாமல் கார்த்தி நடித்திருந்தார் என்பது குறிப்பிடத்தக்கது.