- வீடு›
- பொழுதுபோக்கு›
- துப்பறிவாளன் 2 படத்தை மீண்டும் மிஷ்கின் இயக்குகிறாரா?
துப்பறிவாளன் 2 படத்தை மீண்டும் மிஷ்கின் இயக்குகிறாரா?
By: Monisha Tue, 14 July 2020 11:23:48 AM
மிஷ்கின் இயக்கத்தில் கடந்த 2017ஆம் ஆண்டு வெளியான 'துப்பறிவாளன்' திரைப்படம் மிகப்பெரிய வரவேற்பை பெற்றது. அதில் விஷால், பிரசன்னா ஆகியோர் நடித்திருந்தனர். இந்நிலையில் இந்த படத்தின் இரண்டாம் பாகம் சமீபத்தில் தொடங்கப்பட்டது. இந்த படத்தின் படப்பிடிப்பு இங்கிலாந்து நாட்டில் நடைபெற்ற நிலையில் திரைப்படம் முடிவடையும் நிலையில் திடீரென விஷால் மற்றும் மிஷ்கின் இடையே கருத்து வேறுபாடு ஏற்பட்டது.
இதனை அடுத்து மிஷ்கின் இந்த படத்தில் இருந்து விலகுவதாக அறிவித்தார். அதன் பின்னர் விஷாலே இந்த படத்தின் மீதிப்பகுதியை இயக்க திட்டமிட்டிருந்தார். இந்த நிலையில் கொரோனா வைரஸ் காரணமாக அனைத்து படங்களின் படப்பிடிப்புகளும் நிறுத்தப்பட்டதைபோல் 'துப்பறிவாளன் 2' படத்தின் படப்பிடிப்பும் நிறுத்தப்பட்டது.
இந்த நிலையில் 'துப்பறிவாளன் 2' படத்தை மீண்டும் மிஷ்கினே இயக்க விஷால் கேட்டுக் கொண்டுள்ளதாக கூறப்படுகிறது. மேலும் இதுகுறித்து பேச்சுவார்த்தையும் நடைபெற்று வருவதாக செய்திகள் வெளியாகியது. இருப்பினும் விஷால் மற்றும் மிஷ்கின் தரப்பிலிருந்து இந்த தகவல் உறுதி செய்யப்படவில்லை. 'துப்பறிவாளன் 2' படத்தை சிறப்பாக முடிக்க மிஷ்கினால் மட்டுமே முடியும் என்று முடிவு செய்து இந்த முடிவை விஷால் எடுத்ததாக கூறப்படுகிறது. இருப்பினும் இதுகுறித்த அதிகாரப்பூர்வ அறிவிப்பு இன்னும் வரவில்லை.
விஷால் பிலிம் பேக்டரி தயாரிப்பில் உருவாகிவரும் 'துப்பறிவாளன் 2' படத்தில் விஷால், பிரசன்னா, ரகுமான், முன்னா சைமன், ஆதித்யாமேனன் உள்பட பலர் நடித்து வருகின்றனர்.