பண மோசடி வழக்கில் தெலுங்கு நடிகர் நவீன் ரெட்டியை கைது செய்த போலீசார்

ஹைதராபாத்: பண மோசடி வழக்கில் தெலுங்கு நடிகர் நவீன் ரெட்டியை ஹைதராபாத் குற்றப்பிரிவு போலீசார் கைது செய்துள்ளனர் என்று தகவல்கள் வெளியாகி உள்ளது.

தெலுங்கு திரைப்பட நடிகர் நவீன் ரெட்டி அட்லூரி (34) என்பவர் தனது நண்பர் கட்டா சரின் ரெட்டிக்கு சொந்தமான சொத்துக்களை அபகரித்து ரூ.38 கோடி மோசடி செய்துள்ளார். கட்டா சரின் ரெட்டி கொடுத்த புகாரின் அடிப்படையில் நவீன் ரெட்டி அட்லூரியை மத்திய குற்றப்பிரிவு போலீசார் சில நாட்களுக்கு முன்பு கைது செய்தனர்.

குற்றப்பிரிவு போலீசார் கூறுகையில், ‘கைது செய்யப்பட்ட நடிகர் நவீன் ரெட்டி, தனது தொழில்முறை கூட்டாளியான கதா சரின் ரெட்டியின் கையெழுத்தை போலியாக போட்டு 7.3 ஏக்கர் நிலத்தை திருடியுள்ளார். அந்த நிலத்தை தனது நண்பர் கல்யாண் ரெட்டிக்கு கடந்த ஆண்டு கொடுத்தார்.


இரண்டு மாதங்களுக்குப் பிறகு, கல்யாண் ரெட்டி அந்த நிலத்தை நவீனின் தந்தைவழி மாமா உபேந்தர் ரெட்டிக்கு மாற்றினார். மேலும் ரூ.6 கோடி மதிப்புள்ள நிலத்தை சரின் ரெட்டிக்கு தெரியாமல் மாற்றினார். சினிமா துறையிலும் பணத்தை முதலீடு செய்துள்ளார்.

இதுகுறித்து சரின் ரெட்டி நவீனிடம் கேட்டபோது, கொலை மிரட்டல் விடுத்தார். 38 கோடி மோசடி செய்ததாக நவீன் ரெட்டி மீது ஐபிசி 420, 465, 468 மற்றும் 471 ஆகிய பிரிவுகளின் கீழ் வழக்குப் பதிவு செய்யப்பட்டுள்ளது. இதனால், நவீன் ரெட்டி கைது செய்யப்பட்டுள்ளார்.