யசோதா வெற்றியை வீட்டிற்கே சென்று சமந்தாவிடம் தெரிவித்த படக்குழு

சென்னை: யசோதா படக்குழுவினர் சமந்தாவின் வீட்டிற்கே சென்று வெற்றித் தகவலை பகிர்ந்து கொண்டுள்ளனர்.


நடிகை சமந்தா கதாநாயகியாக நடித்துள்ள யசோதா திரைப்படம் தற்போது வெளியாகியுள்ளது. இந்த படத்தை ஹரி மற்றும் ஹரிஷ் என்கிற இரட்டை இயக்குனர்கள் இயக்கி உள்ளனர். படம் வெளியானது முதல் நல்ல வரவேற்பும் பாசிட்டிவான விமர்சனங்களும் வெளிவர ஆரம்பித்தன.

இதையடுத்து படத்தின் இயக்குனர்கள் தங்களது குழுவினர் சிலருடன் சமந்தாவின் வீட்டிற்கு நேரிலேயே சென்று இந்த வெற்றி தகவலை அவரிடம் கூறி தங்களது மகிழ்ச்சியை அவருடன் பகிர்ந்து கொண்டனர்.இந்த படத்திற்காக சமந்தா ஆக்சன் காட்சிகளில் நடித்தது உட்பட பலவிதமான கடின உழைப்பு கொடுத்துள்ளார்.


கடந்த சில நாட்களுக்கு முன்பு, தசை அழற்சி நோயால் தான் பாதிக்கப்பட்டுள்ளதாகவும் அதற்கு சிகிச்சை எடுத்து வருவதாகவும் தனது வேதனையையும் வெளிப்படுத்தியிருந்தார். இது அவரது ரசிகர்களிடம் மிகப்பெரிய வருத்தத்தை ஏற்படுத்தியது. பலரும் அவர் விரைவில் குணமாக ஆறுதல் கூறிவந்த நிலையில், அவர் நடித்துள்ள யசோதா படத்தின் வெற்றி, அவருக்கு புத்துணர்ச்சி அளிக்கும் விதமாக அமைந்துள்ளது.