'ஜெயிலர்’ பட பாக்ஸ் ஆஃபிஸ் வெற்றியின் எதிரொலியாக நடிகர் ரஜினிகாந்தை சந்தித்த படத்தின் தயாரிப்பாளர்

‘ஜெயிலர்’ படத்தை பொறுத்தவரை அது இயக்குநர் நெல்சன் மற்றும் ரஜினிகாந்த் இருவருக்குமே மிக முக்கியமான படம். காரணம் ‘பீஸ்ட்’ படத்தின் எதிர்மறையான விமர்சனங்களுக்குப் பிறகு ரஜினியை வைத்து நெல்சன் இயக்கும் படம் என்பதால் எதிர்பார்ப்பு பெரிதும் அதிகரித்தது. அதேபோன்று, ‘தர்பார்’, ‘அண்ணாத்த’ படங்களின் பின்னடைவுக்குப் பிறகு பெரிய வெற்றியை கொடுத்தாக வேண்டும் என்ற நிர்பந்தத்திலிருந்தார் ரஜினி.

மொத்தத்தில் பெரும் எதிர்பார்த்தை ஏற்படுத்திய இந்தக் கூட்டணியில் உருவான ‘ஜெயிலர்’ விமர்சகர்களால் கலவையான கருத்துகளை பெற்றபோதிலும், ரசிகர்களால் பாக்ஸ் ஆஃபிஸில் பெரும் வரவேற்பை பெற்று கொண்டு வருகிறது.

இதனை அடுத்து இதுவரை படம் உலக அளவில் ரூ.600 கோடி வசூலை நெருங்கியிருக்கலாம் என்று கூறப்படுகிறது. உலக அளவில் ‘விக்ரம்’, ‘பொன்னியின் செல்வன்’ வசூலை முறியடித்து படம் முன்னேறி கொண்டு வருகிறது.

இந்த நிலையில், இந்த பாக்ஸ் ஆஃபிஸ் வெற்றியின் எதிரொலியாக நடிகர் ரஜினிகாந்தை தயாரிப்பாளர் கலாநிதி மாறன் நேரில் சந்தித்து செக் ஒன்றை கொடுத்து உள்ளார். இது தொடர்பாக புகைப்படங்களை எக்ஸ் பக்கத்தில் வெளியிட்டு உள்ள சன் பிக்சர்ஸ் நிறுவனம், ஜெயிலரின் வெற்றியை கொண்டாடுவதாக குறிப்பிட்டு உள்ளது.