விரைவு ரயிலில் பாதுகாப்பு பணியில் இருந்து காவலர் திடீரென நடத்திய துப்பாக்கிச்சூடு

மகாராஷ்டிரா: ஆர்பிஎப் காவலர் துப்பாக்கிச்சூடு... ஜெய்ப்பூர்-மும்பை விரைவு ரயிலில், பாதுகாப்புப் பணியில் ஈடுபட்டிருந்த ஆர்.பி.எஃப். காவலர் திடீரென துப்பாக்கியால் சுட்டதில், 4 பேர் உயிரிழந்தனர்.

அந்த ரயில், இன்று அதிகாலை மகாராஷ்டிராவில் உள்ள பால்கர் ரயில் நிலையத்தைக் கடந்தபோது, பி-5 பெட்டியில் பாதுகாப்புப் பணியில் ஈடுபட்டிருந்த ஆர்.பி.எஃப் காவலர் சேத்தன் சிங், தனது துப்பாக்கியை எடுத்து திடீரென சரமாரியாக சுட்டார்.

இதில், அவரது உயரதிகாரியான துணை உதவி ஆய்வாளர் டீகா ராம் மீனா மற்றும் பயணிகள் 3 பேர் கொல்லப்பட்டனர்.

பின்னர் ரயில், தஹிசார் ரயில் நிலையம் வந்தபோது, அவர் கீழே குதித்து தப்ப முயன்றார். சக ரயில்வே போலீசார், சேத்தன்சிங்கை மடக்கிப் பிடித்து கைது செய்து, துப்பாக்கிச்சூடு குறித்து போலீசார் விசாரித்து வருகின்றனர்.