இந்திய சட்ட ஆணையம் எடுத்துள்ள கருத்துக் கேட்பு நடவடிக்கை

புதுடில்லி: பொது சிவில் கோட் வரைவு தொடர்பாக பொதுமக்கள் மற்றும் அங்கீகரிக்கப்பட்ட மத நிறுவனங்களிடமிருந்து கருத்துக்களைப் பெறுவதற்கான செயல்முறையை இந்திய 22வது சட்ட ஆணையம் தொடங்கியுள்ளது.

இந்தியாவில் கடந்த 150 ஆண்டுகளாக பொது குற்றவியல் சட்டம் நடைமுறையில் உள்ளது. அதன் படி கிரிமினல் குற்றங்கள் தொடர்பான சட்டங்கள் ஜாதி, மதம், மொழி வேறுபாடின்றி அனைத்து மக்களுக்கும் பொதுவானது.

ஆனால் திருமணம், விவாகரத்து, ஜீவனாம்சம், சொத்துரிமை, பிரிவினை, குழந்தைகளை தத்தெடுத்தல் உள்ளிட்ட பல்வேறு விஷயங்களுக்கு பொது சிவில் சட்டத்தை உருவாக்குவதில் பல்வேறு சிக்கல்களும், எதிர்ப்புகளும் உள்ளன.

இந்து தனிநபர் சட்டம், கிறிஸ்தவ தனிநபர் சட்டம், இஸ்லாமிய தனிநபர் சட்டம் உள்ளிட்ட பல்வேறு மத தனிநபர் சட்டங்கள் அமல்படுத்தப்பட்டுள்ளன. பல நூற்றாண்டுகளுக்கு முன் உருவாக்கப்பட்ட மதச்சட்டங்கள் பல அம்சங்களில் பெண்களின் உரிமைகளை நசுக்குவதாக குற்றச்சாட்டுகள் உள்ளன.

எனவே இதனை சரி செய்ய பொது சிவில் சட்டம் உருவாக்கி அமல்படுத்த வேண்டும் என பல்வேறு பெண்கள் உரிமை அமைப்புகள் கோரிக்கை விடுத்து வருகின்றன. அனைத்து மதங்களுக்கும் பொதுவான பொதுவான சிவில் சட்டம் பிரான்ஸ், அமெரிக்கா போன்ற பல்வேறு வளர்ந்த நாடுகளில் நடைமுறையில் உள்ளது.

இந்நிலையில், பொது சிவில் கோட் வரைவு தொடர்பாக பொதுமக்கள் மற்றும் அங்கீகரிக்கப்பட்ட மத நிறுவனங்களிடமிருந்து கருத்துக்களைப் பெறுவதற்கான செயல்முறையை இந்திய 22வது சட்ட ஆணையம் தொடங்கியுள்ளது. முன்னதாக இந்திய 21வது சட்ட ஆணையம் 2018ஆம் ஆண்டு பொது சிவில் சட்டம் குறித்த ஆலோசனையை நடத்தியது குறிப்பிடத்தக்கது.