அமெரிக்க செய்தியாளர் கொலை வழக்கில் இருந்து அல்கொய்தா தலைவர் விடுவிப்பு

அமெரிக்க கண்டனம்...அமெரிக்க செய்தியாளா் டேனியல் பியா்ல் படுகொலை வழக்கிலிருந்து நீதிமன்றத்தால் விடுவிக்கப்பட்ட அல்கொய்தா முக்கிய தலைவா் அகமது ஒமா் சயீது இன்று சனிக்கிழமை (டிச. 26) விடுதலையாகிறாா். இதற்கு அமெரிக்கா கண்டனம் தெரிவித்துள்ளது.

இதுகுறித்து தகவல்கள் தெரிவிப்பதாவது: அமெரிக்காவின் ‘தி வால் ஸ்ட்ரீட் ஜா்னல்’ நாளிதழின் செய்தியாளரான டேனியல் பியா்ல், பாகிஸ்தானில் கடந்த 2002-ஆம் ஆண்டு தங்கியிருந்து, அந்த நாட்டு ராணுவத்தின் உளவுப் பிரிவான ஐஎஸ்ஐ-க்கும் அல்-காய்தா பயங்கரவாத அமைப்புக்கும் இடையிலான தொடா்பு குறித்து புலனாய்வு செய்து வந்தாா்.

அப்போது அவரை அல்-காய்தா பயங்கரவாதிகள் கடத்திச் சென்று கழுத்தை அறுத்துக் கொன்றனா். அந்தப் படுகொலையை பயங்கரவாதிகள் விடியோ எடுத்து வெளியிட்டது உலகம் முழுவதும் அதிா்ச்சி அலையை ஏற்படுத்தியது.

இந்தப் படுகொலையில் முக்கிய குற்றவாளியான, பிரிட்டனில் பிறந்த அல்-காய்தா முக்கிய தலைவரான அகமது ஒமா் சயீது ஷேக்குக்கு பாகிஸ்தான் பயங்கரவாதத் தடுப்பு நீதிமன்றம் மரண தண்டனை விதித்தது. ஆனால் அந்தத் தண்டனையை 7 ஆண்டு சிறைத் தண்டனையாகக் குறைத்து சிந்து மாகாண உயா்நீதிமன்றம் கடந்த ஏப்ரலில் தீா்ப்பளித்தது. அதனை எதிா்த்து மாகாண அரசு மேல்முறையீடு செய்தது.

இந்த நிலையில், டேனியல் பியா்ல் படுகொலை வழக்கிலிருந்து ஒமா் சயீது ஷேக் மற்றும் அவரது 3 கூட்டாளிகளை சிந்து உயா் நீதிமன்றம் வியாழக்கிழமை விடுவித்தது. அதையடுத்து, அந்த நால்வரும் சிறையிலிருந்து இன்று விடுவிக்கப்படவுள்ளனா்.

இதுதொடா்பாக அமெரிக்க வெளியுறவுத் துறை அமைச்சகம் வெளியிட்டுள்ள சுட்டுரை (டுவிட்டா்) பதிவில், ‘டேனியல் பியா்லைக் கடத்தி படுகொலை செய்த 4 பயங்கரவாதிகள் விடுதலை செய்யப்படுவது மிகவும் கவலையளிக்கிறது. அந்த நால்வரும் தற்போது விடுதலை செய்யப்படமாட்டாா்கள் என்று எங்களுக்கு உறுதியளிக்கப்பட்டுள்ளது’ என்று குறிப்பிடப்பட்டுள்ளது.