எதிர்க்கட்சி உறுப்பினர்கள் அனைவரும் சேர்ந்து வியூகம் வகுத்துள்ளோம்

புதுடெல்லி: ராஜ்யசபா எதிர்க்கட்சி தலைவர் மல்லிகார்ஜுன கார்கே தலைமையில் இன்று (மார்ச் 13) பாராளுமன்றத்தில் 16 கட்சிகள் பங்கேற்ற எதிர்க்கட்சிகளின் கூட்டம் நடந்தது.

இன்று தொடங்கிய பட்ஜெட் கூட்டத்தொடரின் இரண்டாம் கட்ட கூட்டத்தொடரில் எதிர்க்கட்சிகள் எப்படி செயல்படும் என்பது குறித்து ஆலோசிப்பதற்காக எதிர்க்கட்சிகளின் கூட்டம் நாடாளுமன்ற எதிர்க்கட்சி தலைவர் அலுவலகத்தில் நடைபெற்றது.

இதற்கு ராஜ்யசபா எதிர்க்கட்சி தலைவர் மல்லிகார்ஜுன கார்கே தலைமை தாங்கினார். இதில் காங்கிரஸ், திமுக, ஐக்கிய ஜனதா தளம், ஆம் ஆத்மி கட்சி, மார்க்சிஸ்ட் கம்யூனிஸ்ட் கட்சி, கேரள காங்கிரஸ், ராஷ்ட்ரிய லோக் தளம், தேசியவாத காங்கிரஸ் கட்சி, சிபிஐ, இந்திய யூனியன் முஸ்லிம் லீக், சிவசேனா (உத்தவ் தாக்கரே அணி), மதிமுக, புரட்சிகர சோசலிஸ்ட் கட்சி, ஜனதா தளம், ஜார்கண்ட் முக்தி மோர்ச்சா உள்ளிட்ட ராஷ்டிரிய கட்சிகள் பங்கேற்றன.

இந்தக் கூட்டத்தில், மத்திய உளவுத்துறையின் முறைகேடு மற்றும் அதானி விவகாரம் குறித்து விவாதம் நடத்த கோரிக்கை விடுக்கப்பட்டது.

நாடாளுமன்ற கூட்டத் தொடர் தொடங்கும் முன் தனியார் செய்தி நிறுவனத்திடம் மல்லிகார்ஜுன கார்கே கூறுகையில், “வேலையில்லா திண்டாட்டம், பணவீக்கம், அமலாக்கம், சிபிஐ ரெய்டு உள்ளிட்ட அனைத்து பிரச்னைகளையும் எதிர்க்கட்சித் தலைவர்கள் நாடாளுமன்றத்தில் எழுப்புவார்கள். எதிர்க்கட்சி உறுப்பினர்கள் அனைவரும் சேர்ந்து வியூகம் வகுத்துள்ளோம்” என்றார்.

முன்னதாக, பட்ஜெட் கூட்டத்தொடரின் இரண்டாம் கட்ட கூட்டத்தொடரின் முதல் நாளான நேற்று (மார்ச் 12) துணை ஜனாதிபதியும், ராஜ்யசபா தலைவருமான ஜகதீப் தங்கரை காங்கிரஸ் தலைவர் மல்லிகார்ஜுன கார்கே சந்தித்தார். அப்போது அவர், பொறுப்புள்ள அரசாங்கம் அமைப்பதில் ஆக்கப்பூர்வமான பங்களிப்பை வழங்கத் தயார் என்றார்.