கூடுதலாக 254 முதுகலை ஆசிரியர் பணியிடங்களுக்கு அனுமதி

சென்னை: நடப்பு கல்வியாண்டில், தமிழ், ஆங்கிலம், கணிதம், இயற்பியல், வேதியியல், வரலாறு, வணிகவியல், பொருளாதாரம் ஆகிய பாடப்பிரிவுகளில் கூடுதலாக 254 முதுகலை ஆசிரியர் பணியிடங்களுக்கு அனுமதி வழங்கப்பட்டுள்ளது.

பள்ளிக் கல்வி ஆணையர் கே.நந்தகுமார் அனுப்பியுள்ள சுற்றறிக்கை விவரம்: தமிழக அரசுப் பள்ளிகளில் மாணவர் எண்ணிக்கை அடிப்படையில் கடந்த கல்வியாண்டில் முதுநிலை ஆசிரியர் பணியிடங்கள் பள்ளிக் கல்வி பொதுத் தொகுதிக்கு ஒப்படைக்கப்பட்டன.

இதனிடையே பிளஸ்-1 மற்றும் பிளஸ்-2 மாணவர் எண்ணிக்கைக்கு ஏற்ப கூடுதல் ஆசிரியர் பணியிடங்கள் கேட்டு மாவட்ட முதன்மை கல்வி அலுவலர்களிடம் இருந்து கருத்துக்கள் பெறப்பட்டன.

இதையடுத்து, பொதுத் தொகுப்பிடம் ஒப்படைக்கப்பட்ட 254 முதுநிலை ஆசிரியர் பணியிடங்கள், ஆதரவற்ற பள்ளிகளுக்கு மீண்டும் பகிர்ந்தளிக்கப்பட்டுள்ளன. அதன்படி, நடப்பு கல்வியாண்டில், தமிழ், ஆங்கிலம், கணிதம், இயற்பியல், வேதியியல், வரலாறு, வணிகவியல், பொருளாதாரம் ஆகிய பாடப்பிரிவுகளில் கூடுதலாக 254 முதுகலை ஆசிரியர் பணியிடங்களுக்கு அனுமதி வழங்கப்பட்டுள்ளது.