தொழில் அதிபர் அதானி தனது 60-வது பிறந்தநாளையொட்டி ரூ.60,000 கோடி நன்கொடை

புதுடெல்லி: இந்தியாவின் பெரும் கோடீசுவரர்களில் ஒருவர் கவுதம் அதானி. அவருக்கு இன்று (வெள்ளிக்கிழமை) 60-வது பிறந்த நாள் ஆகும். இதையொட்டி அவரது குடும்பத்தினர் ரூ.60 ஆயிரம் கோடி நன்கொடை அளிக்க முடிவு செய்து உள்ளனர்.

சுகாதாரம், கல்வி மற்றும் திறன் மேம்பாட்டு துறைகளுக்கு இந்த நன்கொடை வழங்கப்படுகிறது. அதானி அறக்கட்டளை சார்பில் இந்த பணிகள் நிர்வகிக்கப்படும் என அறிவிக்கப்பட்டு உள்ளது.

இது தொடர்பாக அதானி குழுமம் வெளியிட்டுள்ள அறிக்கையில், 'கவுதம் அதானியின் தந்தை சாந்திலால் அதானியின் பிறந்தநாள் நூற்றாண்டு மற்றும் கவுதம் அதானியின் 60-வது பிறந்தநாளையொட்டி பல்வேறு சமூக நலன்களுக்காக அதானி குடும்பம் ரூ.60,000 கோடி நன்கொடை அளிக்க உறுதிபூண்டுள்ளது' எனவும் குறிப்பிடப்பட்டு உள்ளது.

நன்கொடையாக வழங்கும் ரூ.60 ஆயிரம் கோடி, அதானியின் மொத்த சொத்து மதிப்பில் வெறும் 8 சதவீதம் மட்டுமே ஆகும். இந்திய கார்ப்பரேட் வரலாற்றில் வழங்கப்படும் மிகப்பெரும் நன்கொடைகளில் இதுவும் ஒன்றாகும்.
இதன் மூலம் கவுதம் அதானி மார்க் ஜூக்கர்பெர்க், வாரன் பெப்பட் போன்ற உலக கோடீஸ்வரர்களின் வரிசையில் இடம்பெற்று உள்ளார் என்பது குறிப்பிடத்தக்கது.