கிளாம்பாக்கம் புதிய பேருந்து நிலையம் அடுத்த மாதம் திறப்பு

சென்னை: கிளாம்பாக்கம் பேருந்து நிலையம் செப்டம்பர் 2வது வாரம் திறக்கப்படும் என்று தகவல்கள் வெளியாகி உள்ளது. இந்த புதிய பேருந்து நிலையத்தில் 2,000 பேருந்துகள் வரை வந்து செல்ல முடியும்.

வண்டலூர் அடுத்துள்ள கிளாம்பாக்கத்தில் புதிய பேருந்து நிலையம் கட்டப்பட்டுள்ளது. சென்னையின் போக்குவரத்து நெரிசலை குறைக்க இந்த பேருந்து நிலையம் அமைக்கப்பட்டுள்ளது. வண்டலூரில் இருந்து 1.5 கிலோமீட்டர் தூரத்திலும், ஊரப்பாக்கம் ரெயில் நிலையத்தில் இருந்து ஒரு கிலோமீட்டர் தொலைவிலும் இந்த பஸ் நிலையம் அமைந்துள்ளது.

கிளாம்பாக்க பேருந்து நிலையம் கட்டும் பணி 2019, பிப்ரவரி மாதம் தொடங்கப்பட்டது. சுமாா் 88 ஏக்கா் நிலத்தில் ரூ.400 கோடி செலவில் கட்டப்பட்டுள்ள இந்த பேருந்து நிலையத்தில் 2,000 பேருந்துகள் வரை வந்து செல்லும் வகையிலும், 270 காா்கள் , 3,500 இருசக்கர வாகனங்களை நிறுத்தும் வகையிலும் கட்டுமானங்கள் மேற்கொள்ளப்பட்டுள்ளது.

சென்னையின் பல்வேறு பகுதிகளில் இருந்து வரும் மாநகரப் பேருந்துகள் கிளாம்பாக்கம் புதிய பேருந்து நிலையத்துக்கு வந்து செல்லும் வகையில் தனி இடமும் ஒதுக்கப்பட்டுள்ளது. இந்நிலையில், கிளாம்பாக்கம் பேருந்து நிலையத்தில் தற்போது 99 சதவீத பணிகள் முடிவடைந்துள்ள நிலையில் செப்டம்பர் 2வது வாரத்தில் திறக்க திட்டமிட்டிருப்பதாக தகவல் வெளியாகியுள்ளது.