ராகுல் காந்தி வீட்டுக்கு சென்ற டெல்லி போலீசார்... காங்கிரஸ் கடும் கண்டனம்

புதுடெல்லி: ராகுல் காந்தியின் வீட்டுக்கு டெல்லி போலீசார் சென்றதை காங்கிரஸ் கடுமையாக கண்டித்துள்ளது. பெண்கள் பாலியல் வன்கொடுமை செய்யப்படுவதாக கூறியுள்ள காங்கிரஸ் மூத்த தலைவர் ராகுல் காந்தியின் வீட்டுக்கு டெல்லி போலீசார் இன்று விசாரணை நடத்தினர்.

சமீபத்தில் இந்திய ஒருமைப்பாட்டு யாத்திரையை தொடங்கிய ராகுல் காந்தி, ஜம்மு காஷ்மீர் தலைநகர் ஸ்ரீநகரில் பேசுகையில், பெண்கள் இன்னும் பாலியல் வன்முறைக்கு ஆளாகின்றனர் என்று குறிப்பிட்டார். இது தொடர்பாக வழக்குப்பதிவு செய்துள்ள டெல்லி போலீஸார், இது தொடர்பான கேள்விகளை அனுப்பி, பதில் அளிக்குமாறு கேட்டுக் கொண்டனர்.

இந்நிலையில், இந்த விவகாரம் குறித்து நேரில் விசாரிக்க டெல்லி சட்டம் ஒழுங்கு சிறப்பு ஆணையர் சாகர் ப்ரீத் ஹூடா தலைமையிலான போலீஸார் ராகுல் காந்தியின் வீட்டுக்குச் சென்றனர். “பாலியல் வன்கொடுமைக்கு ஆளானவர்கள் குறித்து தன்னிடம் உள்ள தகவல்களை காவல்துறைக்கு ராகுல் காந்தி அளிக்க வேண்டும். பாதிக்கப்பட்டவர்களின் அடையாளம் தெரிந்தால் மட்டுமே அவர்களுக்கு உரிய பாதுகாப்பு அளிக்க முடியும் என்று போலீசார் தெரிவித்தனர்.

இதனிடையே, ராகுல் காந்தியின் வீட்டிற்கு போலீசார் சென்றதற்கு கட்சியின் மூத்த தலைவர்கள் கண்டனம் தெரிவித்துள்ளனர். அக்கட்சியின் பொதுச்செயலாளர் ஜெய்ராம் ரமேஷ் செய்தியாளர்களிடம் பேசுகையில், “இந்திய ஒருமைப்பாட்டு யாத்திரை முடிந்து 45 நாட்கள் ஆகிறது. உண்மையாகவே டெல்லி காவல்துறைக்கு அக்கறை இருந்தால், ஏன் இத்தனை நாட்கள் அமைதியாக இருந்தார்கள்? அவர்கள் கடந்த மாதம் வந்தார்களா? காங்கிரஸ் கட்சியின் சட்டப்பிரிவு டெல்லி காவல்துறைக்கு தகுந்த பதிலை அளிக்கும்,” என்றார்.

“தகுந்த காரணமின்றி ராகுல் காந்தி வீட்டிற்கு போலீசார் சென்றிருந்தால், அமித்ஷா அனுமதியின்றி நடந்திருக்காது. ராகுல் காந்திக்கு அளிக்கப்பட்ட நோட்டீசுக்கு அவர் பதில் அளிப்பார். ஆனால், அவர் வீட்டிற்கு போலீசார் ஏன் இப்போதே செல்ல வேண்டும்?” என்று கேள்வி எழுப்பினார் ராஜஸ்தான் முதல்வர் அசோக் கெலாட்.

அதானி விவகாரம் தொடர்பான ராகுல் காந்தியின் கேள்விகளால் பிரதமர் மோடி எவ்வளவு அதிர்ச்சி அடைந்துள்ளார் என்பதை இந்த நாடகம் காட்டுகிறது என காங்கிரஸ் கட்சியின் ட்விட்டர் பக்கம் தெரிவித்துள்ளது.