டிடிஎஃப்.வாசனின் ஓட்டுநர் உரிமத்தை 10 ஆண்டுகளுக்கு ரத்து

காஞ்சிபுரம்: காஞ்சி வட்டாரப் போக்குவரத்து அலுவலர் நடவடிக்கை ... கோவை மாவட்டம் மேட்டுப்பாளையம் அருகேயுள்ள வெள்ளியங்காடு பகுதியை சேர்ந்த வெங்கடாசலம் என்பவரது மகன் டிடிஎஃப்.வாசன். இருசக்கர வாகனத்தில் அதிவேகமாகச் சென்று சாகசத்தில் ஈடுபட்டு, அந்த வீடியோக்களை யூடியூபில் பதிவேற்றி பிரபலமடைந்தார்.

இந்த நிலையில், சில நாட்களுக்கு முன்பு காஞ்சிபுரம் அருகேஇருசக்கர வாகனத்தில் சாகசம் செய்வதற்காக அதிவேகமாக ஓட்டியபோது விபத்தில் சிக்கிய வாசன் மீது, காஞ்சிபுரம் போலீஸார் வழக்கு பதிவு செய்தனர். அதன் பின்னர் அவர் கைது செய்யப்பட்டு, சிறையில் அடைக்கப்பட்டார்.

இந்நிலையில், அவரது செயல்பாடுகள் சாலைகளில் செல்லும் இதர வாகனங்களுக்கும், வாகன ஓட்டிகளின் உயிருக்கும் பெரும் அச்சுறுத்தலாக இருப்பதாலும், இளைய தலைமுறையினர் அவரது செயல்பாடுகளைப் பின்பற்றக் கூடாது என்பதற்காகவும், பொதுமக்களின் நலனைக் கருத்தில் கொண்டும், வாசனின் ஓட்டுநர் உரிமத்தை ரத்து செய்வது தொடர்பான குறிப்பாணை வழங்கப்பட்டது.

ஆனால், உரிய பதில் அளிக்காததால் அவரது ஓட்டுநர் உரிமத்தை 10 ஆண்டுகளுக்கு, அதாவது 2033 அக்டோபர் 5-ம் தேதி வரை ரத்து செய்து காஞ்சிபுரம் வட்டாரப் போக்குவரத்து அலுவலர் தினகரன் நடவடிக்கை மேற்கொண்டு உள்ளார்.மேலும், இதுபோன்று பிற வாகன ஓட்டிகளையும், பாதசாரிகளையும் அச்சுறுத்தும் வகையிலும், உயிருக்கு ஆபத்து ஏற்படுத்தும் வகையிலும் அதிவேகமாக மோட்டார் சைக்கிள், கார் ஓட்டுபவர்களின் உரிமம் 10 ஆண்டுகளுக்கு ரத்து செய்யப்படும் எனவும் அவர் எச்சரித்துள்ளார்.