உயிரியல் பூங்காவில் பெண் பயிற்சியாளரை கடித்து படுகாயப்படுத்திய கொரில்லா

பெண் பயிற்சியாளரை கடித்து துவம்சம் செய்த கொரில்லாவால் பெரும் பரபரப்பு ஏற்பட்டது.

ஸ்பெயினில் உள்ள உயிரியல் பூங்காவில் கொரில்லா ஒன்று தன்னை 29 ஆண்டுகள் வளர்த்து பராமரித்த பெண் பயிற்சியாளரை கடித்து துவம்சம் செய்துள்ளது.

மாட்ரிட்டில் உள்ள உயிரியல் பூங்காவில் "Malabo" என்ற கொரில்லாவை பிறந்தது முதல் 29 ஆண்டுகளாக 46 வயதுடைய பெண் பயிற்சியாளர் ஒருவர் அன்புடன் வளர்த்து வந்துள்ளார்.

வழக்கம்போல கொரில்லாவுக்கு உணவு கொடுப்பதற்காக சென்ற போது மூன்று கதவுகளை உடைத்துக் கொண்டு வெளியே வந்த கொரில்லா, அந்த பெண்ணை கடித்து துவம்சம் செய்துள்ளது.

190 கிலோ எடையுள்ள அந்த கொரில்லாவிடம் சிக்கிய அந்த பெண்ணின் இரு கைகளும் உடைந்தது மட்டுமின்றி மார்பு மற்றும் தலையிலும் பலத்த காயம் ஏற்பட்டது. இந்த சம்பவம் பெரும் பரபரப்பை ஏற்படுத்தியது. தொடர்ந்து கொரில்லாவிடம் இருந்து அந்த பெண் மீட்கப்பட்டு மருத்துவமனையில் சேர்க்கப்பட்டுள்ளார். அந்த கொரில்லா திடீரென்று ஏன் ஆவேசம் அடைந்தது என்று தெரியாத நிலை உள்ளது.