சுயசரிதை புத்தகம் குறித்து மோதிக் கொள்ளும் மறைந்த முன்னாள் ஜனாதிபதியின் வாரிசுகள்

மறைந்த முன்னாள் ஜனாதிபதி பிரணாப் முகர்ஜியின் சுயசரிதை புத்தகம் குறித்து அவரது வாரிசுகள் மோதிக் கொள்கின்றனர்.

மறைந்த முன்னாள் குடியரசுத் தலைவர் பிரணாப் முகர்ஜியால் எழுதப்பட்டு விரைவில் வெளியிடப்படவுள்ள ஜனாதிபதி ஆண்டுகள் எனும் புத்தகத்தை முன்வைத்து அவரது மகனும் மகளும் ட்விட்டரில் சண்டையிட்டுக் கொண்டனர். அண்மையில் வெளியீட்டாளரால் வெளியிடப்பட்ட இந்த புத்தகம், 2021 ஜனவரியில் கடைகளில் கிடைக்கும் என்று எதிர்பார்க்கப்படுகிறது.

பிரணாபின் மகன் அபிஜித் முகர்ஜி, தந்தையின் நினைவுக் குறிப்பு ட்விட்டரில் கவலை எழுப்பியதோடு, இறுதி அச்சிடலுக்குச் செல்வதற்கு முன்பு புத்தகத்தைப் படிக்க விரும்புவதாகக் கூறினார். “என் தந்தை இல்லை என்பதால், நான் அவருடைய மகனாக இருப்பதால், புத்தகத்தின் இறுதி நகலின் உள்ளடக்கங்களை அதன் வெளியீட்டிற்கு முன்பே பார்க்க விரும்புகிறேன். என் தந்தை இன்று உயிருடன் இருந்திருந்தால், அவரும் அவ்வாறே செய்திருப்பார்.” என மேற்கு வங்க காங்கிரஸ் தலைவர்களில் ஒருவரான அபிஜித் முகர்ஜி தெரிவித்துள்ளார்.

மற்றொரு ட்வீட்டில், புத்தகத்தின் பகுதிகள் வேண்டுமென்றே சிலரால் ஊடகங்களில் வெளியிடப்பட்டதாக அவர் குற்றம் சாட்டினார். தொடர் ட்வீட்டுகளுக்குப் பிறகு, பிரணாபின் மகள் ஷர்மிஸ்தா முகர்ஜி, புத்தக வெளியீட்டில் தேவையற்ற தடைகளை உருவாக்கியதற்காக தனது சகோதரரை விமர்சித்தார்.

“ஜனாதிபதி ஆண்டுகள் என்ற நினைவுக் குறிப்பின் ஆசிரியரின் மகள் நான், எங்கள் தந்தை எழுதிய கடைசி புத்தகத்தை வெளியிடுவதில் தேவையற்ற தடைகளை ஏற்படுத்த வேண்டாம் என்று எனது சகோதரர் அபிஜித் முகர்ஜியிடம் கேட்டுக்கொள்கிறேன். அவர் உடல்நிலை சரியில்லாமல் கையெழுத்துப் பிரதியை நிறைவு செய்தார்.” என்று ஷர்மிஸ்தா கூறினார் .

“அவர் வெளிப்படுத்திய கருத்துக்கள் அவருடையது. எந்தவொரு மலிவான விளம்பரத்திற்கும் வெளியிடப்படுவதை யாரும் தடுக்க முயற்சிக்கக்கூடாது. அது எங்கள் தந்தைக்கு மிகப்பெரிய அவமதிப்பாக இருக்கும்.” என்று அவர் மேலும் கூறினார்.

இந்த புத்தகத்தில் 2014 காங்கிரஸ் தோல்விக்கு முக்கிய காரணம் சோனியா காந்தி மற்றும் மன்மோகன் சிங் தான் என பிரணாப் முகர்ஜி தன்னுடைய புத்தகத்தில் குறிப்பிட்டுள்ளதோடு, பிரதமர் மோடியை உயர்வாக குறிப்பிட்டிருப்பது போன்ற பல்வேறு விசயங்களால், காங்கிரசில் தனது அரசியல் எதிர்காலத்திற்கு சிக்கல் எழலாம் என்பதால், பிரணாபின் மகன் அபிஜித் முகர்ஜி சர்ச்சையைக் கிளப்பி வருவதாகக் கூறப்படுகிறது.