இன்னும் சில மணி நேரத்தில் இவர் உங்கள் அதிபராகலாம் - ஜோ பிடன் குறித்து இங்கிலாந்து பத்திரிகை கிண்டல்

அமெரிக்க அதிபர் தேர்தலுக்கான வாக்குப்பதிவு நடைபெற்று வருகிறது. அமெரிக்க அதிபர் தேர்தலில் ஜோ பைடன் தொடர்ந்து முன்னிலையில் உள்ளார். அடுத்த அமெரிக்க அதிபராகும் வாய்ப்புள்ள ஜோ பைடன் பேசும்போது தடுமாறுவதுண்டு... அது முதுமை காரணமாக இருக்கலாம். இருப்பினும், சில நேரங்களில் அவர் செய்யும் சொதப்பல்களை அழகாக வீடியோவாக எடுத்து ஊடகங்கள் வெளியிட்டு விடும்.

இந்நிலையில் நேற்று ஜோ பைடன் செய்த ஒரு சொதப்பல் வீடியோ வெளியாகியுள்ளது. இதோ, இவர்தான் எனது மகன் பியூ பைடன் என்று கூறி, ஒரு பெண்ணை தன் ஆதரவாளர்களுக்கு அறிமுகம் செய்தார் ஜோ பைடன். இதில் ஒரு வேடிக்கை என்னவென்றால் ஜோவின் மகன் பியூ பைடன் 2015ஆம் ஆண்டே இறந்துபோய்விட்டார்.

ஒரு வேளை, இவர்தான் பியூ பைடனின் மகள் என்று சொல்வதற்கு பதிலாக, பியூ பைடன் என்று மாற்றி சொல்லிவிட்டாரா என்று பார்த்தால், அந்த பெண் பியூ பைடன் மகளும் இல்லை. அப்புறம், இல்லை இது என் பேத்தி நடாலி என்றார், ஆனால் அது நடாலியும் இல்லை, அது ஜோவின் இன்னொரு மகனான ஹண்டரின் மகள் பின்னேகன்.

கடைசியாக, ஒரு வழியாக, பொறுங்கள், தப்பான ஆளை காட்டிவிட்டேன், இதுதான் நடாலி, என் மகன் பியூ பைடனின் மகள் என்றார் ஜோ. இதேபோல், தேர்தல் பிரச்சாரத்தின்போதும் பலமுறை உளறினார் ஜோ. பேத்தியை, இவர்தான் என்னுடைய மகன் என தவறாக அடையாளம் காட்டும் இவர், இன்னும் சில மணி நேரத்தில் உங்கள் அதிபராகலாம் என டெய்லி மெயில் பத்திரிகை கிண்டல் செய்துள்ளது.