‘ஆசியான்’ அமைப்புடன் எல்லாவகையான தொடர்புகளையும் அதிகரிக்க இந்தியா முன்னுரிமை - பிரதமர் மோடி

‘ஆசியான்’ என்ற தென்கிழக்கு ஆசிய நாடுகள் சங்கமான அமைப்பில் இந்தோனேசியா, மலேசியா, பிலிப்பைன்ஸ், சிங்கப்பூர், தாய்லாந்து, புருனே, வியட்நாம், லாவோஸ், மியான்மர், கம்போடியா ஆகிய 10 நாடுகள் இடம்பெற்றுள்ளன. அதனுடன் பேச்சுவார்த்தை நடத்தும் நட்பு நாடுகளாக இந்தியா, அமெரிக்கா, சீனா, ஜப்பான், ஆஸ்திரேலியா ஆகிய நாடுகள் உள்ளன.

பல ‘ஆசியான்’ நாடுகளுக்கு தென்சீன கடல் பகுதியில் சீனாவுடன் எல்லை பிரச்சினை உள்ளது. இந்தியா-ஆசியான் இடையிலான 17-வது உச்சி மாநாடு நேற்று காணொலி காட்சி மூலம் நடைபெற்றது. அதில், பிரதமர் மோடியும், வியட்நாம் பிரதமரும் கூட்டாக தலைமை தாங்கினார்கள்.

இந்த மாநாட்டில் பிரதமர் மோடி பேசுகையில், தென்கிழக்கு ஆசிய பிராந்திய நாடுகளின் வளர்ச்சிக்கும், பாதுகாப்புக்கும் இணக்கமான, பரிவான ‘ஆசியான்’ அமைப்பு தேவை என்று நாங்கள் கருதுகிறோம். இந்தியாவுக்கும், ஆசியான் அமைப்புக்கும் இடையே எல்லாவகையான தொடர்புகளையும் அதிகரிக்க இந்தியா முன்னுரிமை அளித்து வருவதாக கூறினார்.

மேலும் அவர், பொருளாதாரம், சமூகம், மின்னணு, நிதி, கடல்சார் விவகாரம் உள்பட அனைத்து துறைகளிலும் தொடர்பை வலுப்படுத்த விரும்புகிறோம். கடந்த சில ஆண்டுகளில், இத்துறைகளில் நெருங்கி வந்து விட்டோம் என்று பேசினார்.