நாளை எடப்பாடி பழனிசாமி தலைமையில் மாவட்ட செயலாளர்கள் கூட்டம் நடைபெறவுள்ளதாக தகவல்

சென்னை: நாளை அதிமுக மாவட்ட செயலாளர்கள் கூட்டம் ... தமிழக பாஜக தலைவர் அண்ணாமலை மறைந்த முன்னாள் முதலமைச்சர் அண்ணாவை பற்றி கூறிய கருத்து பெரும் சர்ச்சையை ஏற்படுத்தியது. இது தொடர்பாக செய்தியாளர்களை சந்தித்த முன்னாள் அமைச்சர் ஜெயக்குமார், நாங்கள் தெய்வமாக வணங்கும் அண்ணாவை சிறுமைப்படுத்தும் வகையில் பேசியதை பொறுத்துக் கொள்ளவே முடியாது. பாஜகவால் இங்கு காலூன்றவே முடியாது. எங்களவை வைத்து தான் உங்களுக்கு அடையாளமே கிடைத்து உள்ளது. அதிமுக கூட்டணியில் பாஜக இல்லை. தேர்தல் வரும்போது அதுபற்றி முடிவெடுத்துக்கொள்ளலாம்.

எங்கள் கூட்டணியில் பாஜக இல்லை. இதுதான் எங்கள் முடிவு. இது என் தனிப்பட்ட கருத்து இல்லை, இது கட்சியின் ஒட்டுமொத்த முடிவு என கூறினார். இதனையடுத்து இரு கட்சிகளை சேர்ந்தவர்களும் ஒருவரை ஒருவர் விமர்சித்து கொண்டு வருகின்றனர். இதனால் அதிமுக-பாஜக கூட்டணியில் விரிசல் ஏற்பட்டு உள்ளது.

இந்நிலையில், அதிமுக மூத்த தலைவர்கள் நேற்று டெல்லி சென்றனர்.முன்னாள் அமைச்சர்கள் வேலுமணி, தங்கமணி, ஜெயக்குமார், சி.வி.சண்முகம், கே.பி. முனுசாமி, அதிமுக எம்.பி. தம்பிதுரை உள்ளிட்டோர் பேச்சுவார்த்தை நடத்தினர். இச்சந்திப்பின் போது தமிழக பாஜக தலைவர் பதவியிலிருந்து அண்ணாமலையை மாற்ற வேண்டும் என்பதில் அதிமுக உறுதியாக இருப்பதாக தெரிவித்தனர். அண்ணாமலையை மாற்றினால் மட்டுமே கூட்டணி தொடர்வது பற்றி முடிவு எடுக்கப்படும் என பாஜக தேசிய தலைமையிடம் அதிமுக மூத்த தலைவர்கள் வலியுறுத்தியதாக தகவல் வெளியானது. ஆனால் அதிமுகவின் கோரிக்கையை பாஜக நிராகரித்துவிட்டதாக கூறப்படுகிறது.

இந்த நிலையில், நாளை அதிமுக பொதுச்செயலாளர் எடப்பாடி பழனிசாமி தலைமையில் மாவட்ட செயலாளர்கள் கூட்டம் நடைபெற உள்ளது. அதிமுக-பாஜக கூட்டணியில் விரிசல் ஏற்பட்டுள்ள நிலையில், இது தொடர்பாக ஆலோசிப்பதற்காக நாளை எடப்பாடி பழனிசாமி தலைமையில் மாவட்ட செயலாளர்கள் கூட்டம் நடைபெறவுள்ளதாக தகவல் வெளியாகியுள்ளது. இக்கூட்டத்தில் கூட்டணி குறித்து முக்கிய முடிவு எடுக்கப்படலாம் என்று கூறப்படுகிறது.