நடப்பு சந்தை ஆண்டில் சர்க்கரை உற்பத்தி அதிகரித்துள்ளதாக தகவல்

புதுடில்லி: முந்தைய சந்தை ஆண்டில் உற்பத்தி செய்யப்பட்டதை விட நடப்பு சந்தை ஆண்டில் சர்க்கரை உற்பத்தி அதிகரித்துள்ளது என்று தெரிவிக்கப்பட்டுள்ளது.

இந்திய சர்க்கரை ஆலைகள் சங்கம் (ISMA) வெளியிட்டுள்ள அறிக்கையில் கூறியிருப்பதாவது:- நடப்பு சந்தை ஆண்டு அக்டோபர் 2022 முதல் ஜனவரி 2023 வரையிலான 4 மாதங்களில் நாட்டின் சர்க்கரை உற்பத்தி 1.935 கோடி டன்னாக உள்ளது.

இது முந்தைய ஆண்டின் இதே காலகட்டத்துடன் ஒப்பிடுகையில் 3.42 சதவீதம் அதிகமாகும். முந்தைய சந்தை ஆண்டு அக்டோபர்-ஜனவரி காலத்தில் சர்க்கரை உற்பத்தி 1.871 கோடி டன்னாக இருந்தது. ஜனவரி 31ஆம் தேதி வரை இந்தியா முழுவதும் சுமார் 520 சர்க்கரை ஆலைகள் இயங்கின.

முந்தைய ஆண்டின் இதே தேதியில் 510 ஆலைகள் மட்டுமே இயங்கி வந்தன. உற்பத்தி செய்யப்பட்ட கரும்புச் சாற்றின் ஒரு பகுதியை எத்தனால் உற்பத்திக்குத் திருப்பிய பிறகும், நடப்பு சந்தை ஆண்டின் ஜனவரி வரை சர்க்கரை உற்பத்தி 1.935 கோடி டன்னாக அதிகரித்துள்ளது.

கரும்பு உற்பத்தியில் நாட்டின் முன்னணி மாநிலமான மகாராஷ்டிராவில் கடந்த ஆண்டு சர்க்கரை உற்பத்தி 72.9 லட்சம் டன்னாக இருந்தது. தற்போது 73.8 லட்சம் டன்னாக அதிகரித்துள்ளது.

கரும்பு உற்பத்தியில் நாட்டின் இரண்டாவது பெரிய மாநிலமான உத்தரப் பிரதேசத்தில் சர்க்கரை உற்பத்தி 50.3 லட்சம் டன்னிலிருந்து 51 லட்சம் டன்னாக உயர்ந்துள்ளது. கரும்பு உற்பத்தியில் மூன்றாவது இடத்தில் உள்ள கர்நாடகாவில் சர்க்கரை உற்பத்தி 38.8 லட்சம் டன்னிலிருந்து 39.4 லட்சம் டன்னாக அதிகரித்துள்ளது. 2022-23 சந்தைப்படுத்தல் ஆண்டின் அக்டோபர்-ஜனவரி காலத்தில் பிற மாநிலங்களில் சர்க்கரை உற்பத்தி 29.3 லட்சம் டன்னாக உயர்ந்துள்ளது.

இது முந்தைய ஆண்டின் இதே காலத்தில் 25.1 லட்சம் டன்னாக இருந்தது. மதிப்பீட்டு காலத்தில் சுமார் 22.6 லட்சம் டன் சர்க்கரை எத்தனால் உற்பத்திக்காக திருப்பி விடப்பட்டுள்ளது. இது முந்தைய ஆண்டின் 16.3 லட்சம் டன்களை விட அதிகமாகும்.

2022-23 சந்தையாண்டில் எத்தனால் உற்பத்திக்கான அதிக கரும்புச்சாறு திசைதிருப்பப்படுவதால் இந்தியாவின் ஒட்டுமொத்த சர்க்கரை உற்பத்தி 5 சதவீதம் குறைந்து 3.40 கோடி டன்னாக இருக்கும் என்று எதிர்பார்க்கப்படுகிறது என கூறுகிறது.