பாஜ பெண் தலைவர் குறித்து கமல்நாத் விமர்சனத்திற்கு கடும் கண்டனம்

முன்னாள் முதல்வருக்கு கண்டனம்... பாஜக பெண் தலைவர் இமார்டி தேவி குறித்து பாலியல் ரீதியான கருத்து தெரிவித்ததற்காக காங்கிரஸ் மூத்த தலைவரும், மத்திய பிரதேச முன்னாள் முதல்வருமான கமல்நாத்திற்கு பாஜக தலைவர் ஜோதிராதித்ய சிந்தியா கண்டனம் தெரிவித்துள்ளார்.

கமல்நாத் மத்திய பிரதேசத்தின் குவாலியரில் ஒரு கூட்டத்தில் இமார்டி தேவியை பாலியல் ரீதியாக விமர்சனம் செய்தார். காங்கிரஸ் மூத்த தலைவரின் கருத்துக்கள் குறித்து கேட்டபோது, “இது காங்கிரஸின் கொள்கை. முதலில், திக்விஜய் சிங் காங்கிரஸ் தலைவர் மீனாட்சி நடராஜனைப் பற்றியும் விமர்சனம் செய்தார்.

இப்போது கமல்நாத் பாஜகவின் இமார்டி தேவியை பாலியல் ரீதியாக விமர்சனம் செய்துள்ளார். அஜய் சிங் அவரை ஜிலேபி என்று அழைத்தார். காங்கிரஸ் ஒருபோதும் பெண்களை மதிக்கவில்லை.” என ஜோதிராதித்ய சிந்தியா கூறினார்.

கமல்நாத்தின் சர்ச்சைக்குரிய கருத்தைத் தொடர்ந்து, இமார்டி தேவி அவரை விளாசியதோடு, அவரை கட்சியில் இருந்து நீக்குமாறு காங்கிரஸ் தலைவர் சோனியா காந்தியிடம் கோரிக்கை விடுத்துள்ளார்.