சென்னையில் தாழ்வான பகுதிகள் நீரில் மூழ்க வாய்ப்பு...வானிலை ஆய்வாளர்கள் எச்சரிக்கை

வடகிழக்குப் பருவமழை அதிகம் பெய்தால் சென்னையில் தாழ்வான பகுதிகள் 3 முதல் 6 அடி வரையில் நீரில் மூழ்க வாய்ப்புள்ளதாக வானிலை ஆய்வாளர்கள் கண்டுபிடித்துள்ளனர்.

வானிலை ஆய்வாளர்கள் நடத்திய ஆய்வில் புவி வெப்பமயமாததால் வரும் காலங்களில் வடகிழக்குப் பருவமழை அதிகம் பெய்ய வாய்ப்பு உள்ளதாகவும், இதனால் சென்னையில் தாழ்வான பகுதிகள் 3 முதல் 6 அடி வரையில் நீரில் மூழ்க வாய்ப்புள்ளதாகவும் கண்டுபிடித்துள்ளனர்.

சென்னையை அடிப்படையாகக் கொண்டு கடந்த ஆண்டு நடத்தப்பட்ட ஆய்வில் வரும் காலங்களில் 2015-ஆம் ஆண்டைப்போல பெரு வெள்ளம் ஏற்பட வாய்ப்புள்ளது என்று வானிலை ஆய்வாளர்கள் கூறியுள்ளனர். அவ்வாறு பெருவெள்ளம் ஏற்பட்டால் பெரியமேடு, பட்டாளம், கொசப்பேட்டை, மணலி, திருவொற்றியூர், சிந்தாதிரிப்பேட்டை மற்றும் பெரம்பூர் ஆகிய பகுதிகள் 3 அடி, 6 அடி நீரில் மூழ்கும்.

அதேபோல் அண்ணாநகர், அமைந்தகரை, ஷெனாய்நகர், பள்ளிக்கரணை, துரைப்பாக்கம் மற்றும் மடிப்பாக்கம் ஆகிய பகுதிகள் வெள்ளப் பெருக்கால் அதிக பாதிப்புக்குள்ளாகும் என்று வானிலை ஆய்வாளர்கள் தெரிவிக்கின்றனர்.

இதுகுறித்து சென்னை வானிலை ஆய்வு மைய அதிகாரிகள் கூறியதாவது:- "சென்னையில் 2015-ல் பெருவெள்ளம் ஏற்பட்டிருந்தாலும், 2017-ம் ஆண்டில் கர்நாடகம் மற்றும் ஆந்திராவுடன் ஒப்பிடுகையில் தமிழகத்தில் மிகக்குறைந்த அளவில்தான் வடகிழக்குப் பருவமழை பெய்தது. இந்த ஆண்டு வடகிழக்குப் பருவமழை சராசரி அளவு பெய்யும் என எதிர்பார்த்துள்ளோம்" என்றனர்.