இதுவரை புதிய வகை வைரஸ் பாதிப்பு இல்லை .. அமைச்சர் மா.சுப்பிரமணியன் தெரிவிப்பு

சென்னை: செய்தியாளர்களிடம் பேசிய அமைச்சர் மா.சுப்பிரமணியன், “தமிழகத்தில் இதுவரை புதிய வகை வைரஸ் பாதிப்பு எதுவும் இல்லை. மாநிலம் முழுவதும் மருத்துவ முகாம்கள் நடத்தப்பட்டு வருகிறது. உரிய முன்னெச்சரிக்கை தடுப்பு நடவடிக்கைகள் எடுக்கப்பட்டு வருவகிறது.

இதையடுத்து பருவமழை காலத்தில் 20ஆயிரத்திற்கும் மேற்பட்ட முகாம்கள் நடத்தப்படுவது இதுவே முதல்முறை. 10 மாதங்களாக 1,000 மருத்துவர்களை நியமிக்கப் போராடிக் கொண்டிருக்கிறோம். மருத்துவர்கள் வழக்கு தொடர்வதால் காலிப் பணியிடங்களை நியமிப்பதில் சிக்கல் உள்ளது. மருத்துவர்களுக்கு எவ்வித பிரச்னையாக இருந்தாலும் எங்களிடம் வந்தால் பேசி முடிவுக்கு வரலாம்.

கருணாநிதி நூற்றாண்டினை முன்னிட்டு 100 இடங்களில் காப்பீட்டுத் திட்டத்துக்கான முகாம்கள் நடத்தப்படும் என ஏற்கனவே அறிவிக்கப்பட்டது. எனவே அதன்படி, வருகிற டிசம்பர் 2ம் தேதி தமிழகம் முழுவதும் 100 சட்டமன்றத் தொகுதிகளில் 100 முகாம்கள் நடத்தப்படவிருக்கிறது.

மருத்துவமனையில் அனுமதிக்கப்பட்டுள்ள விஜயகாந்த் பருவகால இருமலால் பாதிக்கப்பட்டு உள்ளார். ‘நம்மைக் காக்கும் 48’ திட்டத்தின் கீழ் விபத்து நடந்து 48 மணி நேரத்திற்குள் அனுமதிக்கப்படும் பயனாளிகளின் மருத்துவ செலவுகளை தமிழ்நாடு அரசே ஏற்கும்.இத்திட்டத்திற்கு தமிழ்நாடு அரசு இதுவரை ரூ 173.77 கோடி வழங்கியுள்ளது” என அவர் கூறினார்.