அமெரிக்காவில் அடுத்த வாரம் முதல் மக்களுக்கு கொரோனா தடுப்பூசி போடப்படும் - டிரம்ப்

உலகிலேயே கொரோனா வைரஸ் அதிகம் பாதிக்கப்பட்ட முதல் நாடாக தொடர்ந்து அமெரிக்கா உள்ளது. அமெரிக்காவில் கொரோனா பாதிக்கப்பட்டவர்களின் எண்ணிக்கை ஒன்றரைக் கோடியை நெருங்கிக் கொண்டிருக்கிறது. மேலும், பலி எண்ணிக்கையும் 3 லட்சத்தை நோக்கி நகர்ந்து கொண்டிருக்கிறது. முதல் அலையை விட கொரோனா 2-வது அலை அதிகமாக பரவி வருகிறது.

கொரோனா பரவும் அதே வேகத்தில் தடுப்பூசியை பயன்பாட்டுக்கு கொண்டு வருவதற்கான முயற்சிகளில் முழு மூச்சில் நடந்து வருகின்றன. அமெரிக்காவின் பைசர் மற்றும் மாட்டானா ஆகிய 2 நிறுவனங்கள் தயாரித்துள்ள தடுப்பூசிகள் இறுதிக்கட்ட பரிசோதனையை முடித்து உணவு மற்றும் மருந்து கட்டுப்பாட்டு நிர்வாகத்தின் ஒப்புதலுக்காக காத்திருக்கின்றன.

இந்நிலையில் அமெரிக்காவில் அடுத்த வாரம் முதல் மக்களுக்கு கொரோனா தடுப்பூசி போடப்படும் என ஜனாதிபதி டிரம்ப் அறிவித்துள்ளார். இதுகுறித்து அவர் கூறுகையில் , தடுப்பூசி சாத்தியமில்லை என யாவரும் நினைத்திருந்தநிலையில், எங்களது தடுப்பூசி வந்து கொண்டிருக்கின்றன என்று தெரிவித்தார்.

மேலும் அவர், இதை செய்து முடிக்க மற்றொரு நிர்வாகம் 5 வருடங்கள் எடுத்திருக்கும். ஆனால் நாங்கள் அதை 7 மாதத்தில் செய்து முடித்துள்ளோம். அவை அடுத்த வாரம் பயன்பட்டுக்கு வருகின்றன. நாங்கள் தடுப்பூசி போட தொடங்கப் போகிறோம். நிறைய பேருக்கு ஏற்கனவே தடுப்பூசி போடப்பட்டுள்ளது என்று தெரிவித்தார்.