தயாரிப்பாளர் சங்க தேர்தல் வாக்குகள் எண்ணும் பணி தொடக்கம்

தயாரிப்பாளர் சங்க தேர்தல் வாக்குகள் எண்ணப்படுகிறது... திரைப்பட தயாரிப்பாளர் சங்கத் தேர்தலில் பதிவான வாக்குகள் இன்று காலை 8 மணிக்கு எண்ணப்படுகின்றன.

அடையாறு எம்ஜிஆர் ஜானகி கல்லூரி வளாகத்தில் பலத்த போலீஸ் பாதுகாப்புடன் வாக்குகள் எண்ணப்பட உள்ளன. டி.ராஜேந்தர் – தேனாண்டாள் முரளி தலைமையில் 2 அணிகள் தயாரிப்பாளர் சங்க தேர்தல் களத்தில் உள்ளனர்.

தமிழ் திரைப்பட தயாரிப்பாளர் சங்க தலைவர் பதவிக்கு சுயேட்சையாக பி.எல். தேனப்பன் போட்டியிட்டுள்ளார். தேர்தலில் ஆயிரத்து 303 உறுப்பினர்கள் வாக்களிக்க தகுதி பெற்றிருந்த நிலையில் ஆயிரத்து 50 பேர் வாக்களித்தனர்.

தலைவர், பொருளாளர், 2 துணை தலைவர்கள், 2 செயலாளர்கள், 21 செயற்குழு உறுப்பினர்கள் பதவிக்கு 112 பேர் போட்டியிட்டுள்ளனர்.

தமிழ் திரைப்பட தயாரிப்பாளர் சங்கத் தேர்தல் நேற்று நடந்து முடிந்தது. சென்னை எம்ஜிஆர் ஜானகி கல்லூரியில் காலை 8 மணிமுதல் மாலை 4 மணி வரை நடைபெற்றது. இதில் டிஆர் அணியினர் வாக்குக்கு பணம் மற்றும் தங்க நாணயம் அளிப்பதாக புகார் எழுந்தது. மேலும் இத்தேர்தலில் ரஜினிகாந்த், தனுஷ், பாரதிராஜா உள்ளிட்டோர் வாக்களிக்கவில்லை.