தமிழ்நாட்டில் 1 முதல் 5ஆம் வகுப்பு மாணவர்களுக்கு இன்று பள்ளிகள் திறப்பு

சென்னை: தமிழ்நாட்டில் கோடை விடுமுறைக்காக 1 முதல் 12-ம் வகுப்பு மாணவர்களுக்கு ஏப்ரல் 29ஆம் தேதி முதல் விடுமுறை அறிவிக்கப்பட்டது. இதன் பின் ஜூன் 1-ம் தேதி பள்ளிகள் திறக்கப்படும் என பள்ளிக்கல்வித்துறை அறிவித்த நிலையில் , கோடை வெப்பத்தின் காரணமாக மாணவர்களின் நலன் கருதி பள்ளி திறப்பை ஒத்திவைக்க வேண்டும் என அரசியல் கட்சியினர் வலியுறுத்தினர்.

இதையடுத்து ஜூன் 7-ம் தேதி பள்ளிகள் திறக்கப்படும் என்று தெரிவிக்கப்பட்டது. ஆனால் வெயிலின் தாக்கம் குறையாத நிலையில் பள்ளி கல்வித்துறை அமைச்சர் அன்பில் மகேஷ் பொய்யாமொழி முதல்வர் மு.க. ஸ்டாலின் உடன் ஆலோசனை மேற்கொண்டு, பள்ளி திறப்பை மீண்டும் ஒத்திவைத்தார்.

எனவே அதன்படி 6 முதல் 12 ஆம் வகுப்பு மாணவர்களுக்கு ஜூன் 12-ம் தேதி பள்ளிகள் திறக்கப்பட்ட நிலையில் 1 முதல் 5-ம் வகுப்பு மாணவர்களுக்கு ஜூன் 14-ம் தேதியும் பள்ளிகள் திறக்கப்படும் என அறிவிக்கப்பட்டது.

இந்த நிலையில் கோடை விடுமுறை முடிந்து 1முதல் 5 -ம் வகுப்பு மாணவர்களுக்கு இன்று முதல் பள்ளிகள் திறக்கப்பட்டுள்ளன. முதல் நாளான இன்றே மாணவர்களுக்கு இலவச பாட புத்தகங்களை வழங்க அரசு ஏற்பாடு செய்து உள்ளது.