அரிசி கடத்தல் வெகுவாக குறைந்துள்ளது... கூட்டுறவுத்துறை செயலர் பெருமிதம்

சென்னை: அரிசி கடத்தல் வெகுவாக குறைந்துள்ளதால், அதை மேலும் கட்டுப்படுத்த கூடுதல் காவல் துணைக் கண்காணிப்பாளர் தலைமையில் தீவிர கண்காணிப்புப் பணிகள் மேற்கொள்ளப்பட்டு வருகின்றன என்று கூட்டுறவுத்துறை செயலர் ராதாகிருஷ்ணன் தெரிவித்துள்ளார்.


திருவொற்றியூர் தனியார் பள்ளியின் 19வது ஆண்டு விழாவில், கூட்டுறவுத் துறை முதன்மைச் செயலர் ராதாகிருஷ்ணன், நல்லி குப்புசாமி உள்ளிட்டோர் பங்கேற்றனர்.

பின்னர் செய்தியாளர்களிடம் பேசிய கூட்டுறவு துறை செயலாளர் ராதாகிருஷ்ணன், குறுவை சாகுபடிக்கு 11.23 லட்சம் மெட்ரிக் டன் சம்பா உள்ளிட்ட பொருட்கள் கொள்முதல் செய்யப்பட்டுள்ளதாக தெரிவித்தார்.

1 லட்சத்து 45 ஆயிரத்துக்கும் மேற்பட்ட விவசாயிகள் பயனடைந்துள்ளனர். விவசாயிகளுக்கு அரசு இதுவரை ரூ.11,618 கோடி கூட்டுறவு கடன் வழங்கியுள்ளது. 4,800 ரேஷன் கடைகள் புதுப்பிக்கப்பட்டுள்ளன. அரிசி கடத்தல் வெகுவாக குறைந்துள்ளதால், அதை மேலும் கட்டுப்படுத்த கூடுதல் காவல் துணைக் கண்காணிப்பாளர் தலைமையில் தீவிர கண்காணிப்புப் பணிகள் மேற்கொள்ளப்பட்டு வருகின்றன.

இது தொடர்பாக 15 ஆயிரத்துக்கும் மேற்பட்ட வழக்குகள் பதிவு செய்யப்பட்டுள்ளன. அரிசி கடத்தல் வழக்கில் 132 பேர் கைது செய்யப்பட்டுள்ளனர். அதேசமயம், அரசு இலவசமாக வழங்கப்படும் அரிசியை விற்கக்கூடாது என்பதையும் பொதுமக்களுக்கு உணர்த்த வேண்டும்.

தமிழகத்தில் ரேஷன் கடைகளில் சில இடங்களில் கோதுமை தட்டுப்பாடு இருப்பது உண்மைதான். 10,000 மெட்ரிக் டன் கோதுமை கொள்முதல் செய்ய இந்திய உணவுக் கழகத்திடம் கோரிக்கை விடுத்துள்ளோம். ஒதுக்கீடு செய்வதாக உறுதியளித்துள்ளனர். மேலும் கோதுமை வந்தால் விரைவில் கோதுமை தட்டுப்பாடு நீங்கும் என்றார்.