மதிமுகவை திமுகவுடன் இணைப்பதே சிறந்த வழி... அவைத்தலைவர் கடிதம்

சென்னை: மதிமுகவை அதன் தாய்க் கட்சியான திமுகவுடன் இணைப்பதே சமகால அரசியலுக்குச் சிறந்த வழி என்று அவைத் தலைவர் திருப்பூர் துரைசாமி வைகோவுக்கு கடிதம் எழுதியுள்ளார்.

ம.தி.மு.க.வின் தற்போதைய செயல்பாடுகள் குறித்து பொதுச்செயலாளர் வைகோவுக்கு ம.தி.மு.க அவைத் தலைவர் திருப்பூர் துரைசாமி கடிதம் எழுதியுள்ளார்.

ம.தி.மு.க.,வின் தற்போதைய செயல்பாடுகள் வருத்தமளிக்கிறது. ம.தி.மு.க., துவக்க காலத்தில், வாரிசு அரசியலுக்கு எதிரான வைகோவின் ஆவேசமான பேச்சுகளைக் கேட்டு, வைகோவின் வார்த்தைகள் உறுதியாகவும், உண்மையாகவும் இருக்கும் என நம்பி, லட்சக்கணக்கான தொண்டர்கள் அவருக்கு ஆதரவு அளித்தனர்.

ஆனால் வைகோவின் குழப்பமான அரசியல் நிலைப்பாட்டால் வைகோவை ஆதரித்து திமுகவில் பிளவுபட்ட பல முன்னணி தலைவர்களும் தோழர்களும் படிப்படியாக மதிமுகவில் இருந்து விலகி மீண்டும் திமுகவிற்கு சென்றனர். வைகோ நேர்மையாகவும், உண்மையாகவும் இருப்பின், ஒவ்வொரு வார்டிலும் உறுப்பினர்களை புதுப்பித்தவர்களின் பெயர், ஆதார் எண், புதிய உறுப்பினர்களின் பெயர், ஆதார் எண் ஆகியவற்றை சங்கொலியில் வெளியிடுமாறு கேட்டுக்கொள்கிறேன்.

மகனை ஆதரிப்பதும், அரவணைப்பதும், சந்தர்ப்பவாத அரசியலும் பொதுவெளியில் சங்க உறுப்பினர்களை தமிழக மக்களை சிரிக்க வைத்துள்ளது. இது வருந்தத்தக்க மற்றும் வேதனையான நிகழ்வு என்பதை வைகோ இன்னும் உணரவில்லை.

கடந்த 30 ஆண்டுகளாக வைகோவின் ஆவேசப் பேச்சை நம்பி உயிர் இழந்த தோழர்கள் மேலும் ஏமாற்றமடையாமல் இருக்க, மதிமுகவை அதன் தாய்க் கட்சியான திமுகவுடன் இணைப்பதே சமகால அரசியலுக்குச் சிறந்த வழி. இவ்வாறு அவர் கடிதத்தில் தெரிவித்துள்ளார்.