கல்வான் பள்ளத்தாக்கு மோதல் சீனா அரசால் திட்டமிட்டு நடத்தப்பட்டது - அமெரிக்கா

கடந்த ஜூன் மாதம் 15-ந் தேதி லடாக்கின் கிழக்கு பகுதியில் அத்து மீறிய சீன ராணுவ வீரர்களுக்கும், இந்திய வீரர்களுக்கும் ஏற்பட்ட மோதலில் இந்திய தரப்பில் 20 பேர் வீரமரணம் அடைந்தனர். சீன தரப்பில் 35 பேர் உயிர் இழந்தனர். ஆனால் சீன தரப்பில் உயிரிழப்பு விவரங்களை வெளியிடவில்லை. தற்போது இந்த மோதல் சீன அரசால் திட்டமிட்டு நடத்தப்பட்டது என அமெரிக்கா கூறியுள்ளது.

அமெரிக்கா-சீனா பொருளாதார மற்றும் பாதுகாப்பு மறுஆய்வு ஆணையம் புதன்கிழமை வெளியிட்ட அறிக்கையில், ஜூன் 2020 இல், சீனா மற்றும் இந்திய படைகள் இரு நாடுகளையும் பிரிக்கும் உண்மையான கட்டுப்பாட்டு வரிசையில் மேற்கு லடாக் பிராந்தியத்தில் அமைந்துள்ள கல்வான் பள்ளத்தாக்கில் ஒரு பெரிய மோதலில் ஈடுபட்டன. உண்மையான கட்டுப்பாட்டு வரிசையில் பல இடங்களில் மே மாதம் தொடக்கத்தில் தொடங்கிய தொடர்ச்சியான மோதல்களைத் தொடர்ந்து இந்த மோதல் ஏற்பட்டது என கூறப்பட்டுள்ளது.

மேலும் அதில், உறுதிப்படுத்தப்படாத எண்ணிக்கையிலான சீன வீரர்கள் உயிரிழந்தனர். 1975 க்குப் பிறகு முதல் முறையாக இரு தரப்பினருக்கும் இடையிலான சண்டையில் உயிர்கள் பறிபோனது. ஜப்பான் முதல் இந்தியா வரையிலான நாடுகளுடன் ராணுவ அல்லது துணை ராணுவ மோதல்களைத் தூண்டி, அண்டை நாடுகளுக்கு எதிராக சீனா பல ஆண்டுகளாக செயல்பட்டு வருகிறது. ஜூன் மாதம் நடைபெற்ற கல்வான் சம்பவமும் சீன அரசாங்கம் திட்டமிட்டு செயல்படுத்தியது தான் என அதில் கூறப்பட்டு உள்ளது.

சீனா இந்தியாவை உண்மையான கட்டுப்பாட்டு வரிசையில் உள்கட்டமைப்பைக் கட்டியெழுப்புவதைத் தடுக்க அல்லது அமெரிக்காவுடன் இணைவதற்கு எதிராக எச்சரிப்பதை நோக்கமாகக் கொண்டது என கூறி உள்ளது. மேலும் சில சான்றுகள் சீன அரசாங்கம் இந்த சம்பவத்தைத் திட்டமிட்டு நடத்தியதாக் கூறின, இதில் இறப்புக்கான சாத்தியக்கூறுகள் அடங்கும். இந்த சம்பவத்திற்கு இரண்டு வாரங்களுக்கு முன்னர் சீனா அரசுக்கு சொந்தமான குளோபல் டைம்ஸின் தலையங்கம் இந்தியாவுக்கு பாதிப்பை ஏற்படுத்தும் என்று எச்சரித்தது.