புயல் காரணமாக வெற்றிவேல் யாத்திரை ரத்து - தமிழக பா.ஜ.க. தலைவர்

புயல் காரணமாக வெற்றிவேல் யாத்திரை ரத்து செய்யப்படுகிறது என்று தமிழக பா.ஜ.க. தலைவர் எல்.முருகன் அறிவித்துள்ளார்.

தமிழக பா.ஜனதா சார்பில் கடந்த 6-ந்தேதி முதல் அடுத்த மாதம் 6-ந்தேதி வரை தமிழகம் முழுவதும் வேல் யாத்திரை நடத்த திட்டமிட்டனர். ஆனால் இந்த யாத்திரைக்கு கொரோனாவை காரணம் காட்டி அரசு அனுமதி மறுத்துவிட்டது. இருப்பினும் தடையை மீறி திருத்தணியில் இருந்து கடந்த 6-ந்தேதி வேல் யாத்திரை தொடங்கியது.

தீபாவளி விடுமுறைக்கு பிறகு 17-ந்தேதி முதல் திருவண்ணாமலையில் இருந்து யாத்திரை தொடங்கப்பட்டது. மேலும், வேல் யாத்திரை அடுத்த மாதம் 7-ந்தேதி திருச்செந்தூரில் முடிவடைவதாக அறிவிக்கப்பட்டுள்ளது.

இந்நிலையில், புயலின் காரணமாக வெற்றிவேல் யாத்திரை ரத்து செய்யப்படுகிறது என்று தமிழக பா.ஜ.க. தலைவர் எல்.முருகன் அறிவித்துள்ளார். இது தொடர்பாக அவர் வெளியிட்டுள்ள அறிக்கையில் கூறியிருப்பதாவது:-

தஞ்சாவூர், திருவாரூர், நாகப்பட்டினம் ஆகிய மாவட்டங்களில் நடக்க இருந்த வெற்றிவேல் யாத்திரையானது புயலின் காரணமாக ரத்து செய்யப்படுகிறது. தமிழக பா.ஜ.க. தொண்டர்கள் அனைவரும் புயலில் இருந்து மக்களை பாதுகாக்கவும், அவர்களுக்கு தேவையான அனைத்து உதவிகளை செய்வதற்கும் தயாராக இருக்கும்படி கேட்டுக்கொள்கிறேன். இவ்வாறு அவர் கூறியுள்ளார்.