ஆஸ்திரேலியா அணிக்கு எதிரான போட்டியில் இங்கிலாந்து அணி வெற்றி

ஆஸ்திரேலியா: ஆஸ்திரேலிய அணிக்கெதிரான முதலாவது டி-20 போட்டியில், இங்கிலாந்து அணி 8 ரன்கள் வித்தியாசத்தில் வெற்றிபெற்றது.

இந்த வெற்றியின் மூலம் மூன்று போட்டிகள் கொண்ட டி-20 தொடரில் 1-0 என்ற கணக்கில் இங்கிலாந்து அணி முன்னிலைப் பெற்றுள்ளது. பெர்த் மைதானத்தில் நேற்று நடைபெற்ற இப்போட்டியில், நாணய சுழற்சியில் வெற்றிபெற்ற ஆஸ்திரேலியா முதலில் பீல்டிங்கை தீர்மானித்தது.

இதன்படி முதலில் பேட்டிங் செய்த இங்கிலாந்து அணி, நிர்ணயிக்கப்பட்ட 20 ஓவர்கள் நிறைவில் 6 விக்கெட்டுகள் இழப்புக்கு 208 ரன்கள் எடுத்தது. இதில் அணியின் அதிகப்பட்சமாக அலெக்ஸ் ஹெல்ஸ் 84, ஜோஸ் பட்லர் 68 ரன்கள் எடுத்தனர்.

ஆஸ்திரேலியக் கிரிக்கெட் அணி பந்துவீச்சில், நாதன் எலீஸ் 3 விக்கெட்டுகளையும் கேன் ரிச்சட்சன், டேனில் சேம்ஸ் மற்றும் மார்கஸ் ஸ்டொயினிஸ் ஆகியோர் தலா 1 விக்கெட்டினையும் வீழ்த்தினர்.

தொடர்ந்து 208 ரன்கள் என்ற வெற்றி இலக்கை நோக்கி பதிலுக்கு களமிறங்கிய ஆஸ்திரேலியா அணியால், 20 ஓவர்கள் நிறைவில் 9 விக்கெட்டுகள் இழப்புக்கு 200 ரன்ங்களை மட்டுமே பெற முடிந்தது. இதனால், இங்கிலாந்து அணி 8 ரன்கள் வித்தியாசத்தில் வெற்றிபெற்றது.

இதன்போது அணியின் அதிகபட்சமாக, டேவிட் வார்னர் 73, மிட்செல் மார்ஷ் 36 ரன்களையும் பெற்றுக்கொண்டனர். இங்கிலாந்து அணியின் பந்துவீச்சில், மார்க்வுட் 3 விக்கெட்டுகளையும் ரீஸ் டொப்லே மற்றும் சேம் கர்ரன் ஆகியோர் தலா 2 விக்கெட்டுகளையும் அடில் ராஷித் 1 விக்கெட்டினையும் வீழ்த்தினர். இப்போட்டியின் ஆட்டநாயகனாக, 51 பந்துகளில் 3 சிக்ஸர்கள் 12 பவுண்ட்ரிகள் அடங்கலாக 84 ரன்களை எடுத்த அலெக்ஸ் ஹெல்ஸ் தேர்வு செய்யப்பட்டார்.