விராட் இல்லாமல் இந்திய அணி வென்றால் ஓராண்டுக்கு வெற்றியை கொண்டாடலாம் - மைக்கேல் கிளார்க்

இந்திய அணி கேப்டன் விராட்கோலி ஆஸ்திரேலிய சுற்றுப்பயணத்தில் பாதியில் நாடு திரும்புகிறார். ஆஸ்திரேலியாவுக்கு எதிரான 4 டெஸ்ட் தொடரில் ஒரே ஒரு டெஸ்டில் மட்டுமே விளையாடுகிறார். அவரது மனைவி அனுஷ்காவுக்கு குழந்தை பிறப்பதால் எஞ்சிய 3 டெஸ்டில் விராட்கோலி விளையாடாமல் இந்தியா திரும்புகிறார்.

கோலி இல்லாமல் இந்திய அணி ஆஸ்திரேலியாவில் டெஸ்டில் விளையாடுவது மிகப்பெரிய பாதிப்பை ஏற்படுத்தும் என்று இந்திய, ஆஸ்திரேலிய முன்னாள் வீரர்கள் ஏற்கனவே கருத்து தெரிவித்து இருந்தனர்.
இந்நிலையில் ஆஸ்திரேலிய முன்னாள் கேப்டன் மைக்கேல் கிளார்க், விராட்கோலி இடத்தை யாராலும் நிரப்ப முடியாது என்பதே எனது கருத்து. கேப்டன் பொறுப்பிலும், பேட்டிங்கிலும் அவர் இல்லாவிட்டால் மிகப் பெரிய வெற்றிடம் ஏற்படும் என்று கூறியுள்ளார்.

விராட்கோலி இல்லாத குறையை எந்த பேட்ஸ்மென் நிரப்புவார்? என்பது இந்த டெஸ்ட் தொடரில் ஆவலாக எதிர்பார்க்கப்படுகிறது. ஒரு வேளை விராட்கோலி இல்லாமல் டெஸ்ட் தொடரில் இந்திய அணி ஆஸ்திரேலியாவை வீழ்த்தி விட்டால் ஓராண்டுக்கு இந்த வெற்றியை கொண்டாடலாம். லோகேஷ் ராகுல் சிறந்த வீரர். அறிவார்ந்தவர். அதில் எந்த சந்தேகமும் இல்லை. ஆஸ்திரேலியாவில் இதற்கு முன்பு விளையாடிய அனுபவத்தை அவர் பெற்றுள்ளார். ஆனால் விராட் கோலி இடத்தை யாராலும் நிரப்பமுடியாது என்பதை ஏற்றுக்கொள்ள வேண்டும் என மைக்கேல் கிளார்க் தெரிவித்தார்.

மேலும் அவர், எனக்கு ரகானேவை மிகவும் பிடிக்கும். அவர் சிறந்த வீரர். அவர் சிறப்பாக செயல்பட்டால் வரலாறு படைக்க முடியும். நம்பிக்கையுடன் டெஸ்ட் தொடரை இந்திய வீரர்கள் அணுகவேண்டும். ஆஸ்திரேலியாவை வீழ்த்தும் அளவுக்கு போதுமான திறமை இருக்கிறது என்பதை நம்ப வேண்டும் என கிளார்க் கூறி உள்ளார்.