அனைத்து போட்டிகளிலிருந்தும் ஓய்வு... முரளி விஜய் அறிவிப்பு

புது தில்லி: அனைத்து போட்டிகளிலிருந்தும் ஓய்வு பெறுவதாக இந்திய கிரிக்கெட் வீரர் முரளி விஜய் அறிவித்துள்ளார்.முரளி விஜய் 2008ல் இந்திய கிரிக்கெட் அணியில் அறிமுகமானார். தமிழகத்தின் வலது கை பேட்ஸ்மேனான முரளி விஜய் அனைத்து விதமான போட்டிகளிலும் சிறப்பாக விளையாடி வருகிறார். இந்திய அணிக்காக முரளி விஜய் 61 டெஸ்ட், 17 ஒருநாள் மற்றும் 9 டி20 போட்டிகளில் விளையாடியுள்ளார்.

61 டெஸ்ட் போட்டிகளில் விளையாடி 3,982 ரன்கள் எடுத்துள்ளார். அவற்றில் 15 அரை சதங்களும் 12 சதங்களும் அடங்கும். 17 ஒருநாள் போட்டிகளில் 339 ரன்கள் எடுத்துள்ளார். இதில் அரை சதமும் அடங்கும். முரளி விஜய் 9 டி20 போட்டிகளில் 169 ரன்கள் எடுத்துள்ளார். டெஸ்டில் தனது சிறந்த ஆட்டத்தை வெளிப்படுத்திய முரளி விஜய், 2014-ம் ஆண்டு இங்கிலாந்து சுற்றுப்பயணத்தின் போது அபாரமான பந்துவீச்சு வரிசைக்கு மத்தியில் 1000 பந்துகளை எதிர்கொண்டார்.

முரளி விஜய் கடைசியாக 2018-ல் ஆஸ்திரேலியாவுக்கு எதிரான ஆட்டம் விளையாடினார் . அதன் பிறகு அவர் இந்திய அணியில் இடம்பெறவில்லை. இந்நிலையில், அனைத்து போட்டிகளிலிருந்தும் ஓய்வு பெறுவதாக அறிவித்துள்ளார்.

இது தொடர்பாக அவர் வெளியிட்டுள்ள அறிக்கையில், கிரிக்கெட் தொடர்பான தொழில்களில் வாய்ப்புகளை தேட உள்ளேன். சமீபத்தில் முரளி விஜய் பிசிசிஐயை நம்பி சோர்வாக இருப்பதாக கூறினார். வெளிநாட்டில் வாய்ப்புகளை எதிர்பார்த்து காத்திருப்பதாகவும் கூறினார். முரளி விஜய் தற்போது தனது ஓய்வை அறிவித்துள்ளார்.