சுனில் கவாஸ்கரின் வலைப்பயிற்சியை பார்க்கும்போது, எப்படி ரன் குவிக்கப் போகிறார் எனத் தோன்றும் - கிரண் மோரே

டெஸ்ட் கிரிக்கெட்டில் 10 ஆயிரம் ரன்களை கடந்த முதல் வீரராக இந்திய முன்னாள் கேப்டன் சுனில் கவாஸ்கர் உள்ளார். இவருக்கு வலை பயிற்சி என்றாலே அலர்ஜி என அவருடன் இணைந்து விளையாடிய கிரண் மோரே ரகசியத்தை தெரிவித்துள்ளார்.

இதுகுறித்து முன்னாள் விக்கெட் கீப்பரான கிரண் மோரே கூறுகையில், வலை பயிற்சியில் நான் பார்த்தமட்டில் மோசமான ஆட்டக்காரர்களில் ஒருவர் கவாஸ்கர். அவருக்கு வலைப்பயிற்சியில் ஈடுபடுவது ஒரு போதும் பிடிக்காது. ஏனோ, அதில் அவர் எப்போதும் தடுமாறுவார் என்று தெரிவித்துள்ளார்.

அவரை வலை பயிற்சியில் பார்த்து விட்டு, மறுநாள் டெஸ்ட் கிரிக்கெட்டில் பேட்டிங் செய்வதை பார்த்தால் நிச்சயம் 99.9 சதவீதம் வித்தியாசம் இருக்கும். வலை பயிற்சியில் அவரை பார்க்கும்போது, இவர் எல்லாம் எப்படி ரன் குவிக்கப்போகிறார் என்று சொல்வீர்கள் என கிரண் மோரே வெளிப்படையாக தெரிவித்துள்ளார்.

மேலும் அவர், மறுநாள் டெஸ்ட் கிரிக்கெட்டில் களத்தில் அவரை பார்க்கும்போது, ‘வாவ்’ பிரமாதமாக ஆடுகிறார் என ஆச்சரியப்பட்டு பாராட்டுவீர்கள். ஆட்டத்தின் மீது அவர் கவனம் செலுத்தும் விதம் நம்ப முடியாத அளவுக்கு இருக்கும் என்று சுனில் கவாஸ்கர் குறித்து பெருமையாக கூறியுள்ளார்.