பிளேஆஃப்ஸ் சுற்றில் இரண்டு அரைசதங்கள் அடித்த சாதனை வீரர்கள் பட்டியலில் இணைந்த வில்லியம்சன்

ஐபிஎல் போட்டியின் லீக் ஆட்ட முடிவில் சன்ரைசர்ஸ் ஐதராபாத் 3-வது இடம் பிடித்து பிளேஆஃப்ஸ் சுற்றுக்கு முன்னேறியது. நேற்று முன்தினம் நடைபெற்ற எலிமினேட்டர் சுற்றில் ஆர்சிபியை எதிர்கொண்டபோது, முதலில் பேட்டிங் செய்த ஆர்சிபி 131 ரன்களே அடித்தது. பின்னர் 132 ரன்கள் அடித்தால் வெற்றி என்ற இலக்குடன் ஐதராபாத் களம் இறங்கியது.

இறுதியில் 2 பந்துகள் மீதமுள்ள நிலையில் இலக்கை எட்டியது. ஐதராபாத் அணியின் வெற்றிக்கு கேன் வில்லியம்சன் அரைசதம் முக்கிய காரணமாக இருந்தது. இன்று குவாலிபையர் 2-ல் டெல்லி கேப்பிட்டல்ஸ் அணியை எதிர்கொண்டது. இந்த போட்டியில் டெல்லி கேப்பிட்டல்ஸ் 189 ரன்கள் குவித்தது.

190 ரன்கள் அடித்தால் வெற்றி என்ற இலக்குடன் களம் இறங்கிய ஐதராபாத் அணிக்கு வார்னர், மணிஷ் பாண்டே ஏமாற்றம் அளித்தனர். கேன் வில்லியம்சன் சிறப்பாக விளையாடி அரைசதம் அடித்தார். தொடர்ந்து விளையாடிய அவர் 67 ரன்னில் ஆட்டமிழந்தார்.

இதன்மூலம் பிளேஆஃப்ஸ் அல்லது நாக்அவுட் சுற்றில் இரண்டு அரைசதம் அடித்த வீரர்கள் சாதனையில் இடம் பிடித்துள்ளார். இதற்கு முன் 2013-ல் வெயின் ஸ்மித், 2014-ல் சுரேஷ் ரெய்னா, 2015-ல் லென்டில் சிம்மன்ஸ், 2016-ல் டேவிட் வார்னர், 2019-ல் வாட்சன் ஆகியோர் இரண்டு அரைசதங்களுக்கு மேல் அடித்துள்ளனர்.