ஓட்டல் சுவையில் வீட்டிலேயே செய்யலாம் நண்டு கிரேவி

சென்னை: ஓட்டலில் மட்டும் எப்படி நண்டு கிரேவி இவ்வளவு ருசியாக இருக்கு என்று நினைத்து இருப்பீர்கள். அதே சுவையில் வீட்டில் செய்து பாருங்கள். செய்முறை இதோ உங்களுக்காக.

தேவையானவை :

நண்டு - 1 கிலோ
தக்காளி - 200 கிராம்
இஞ்சி - சிறிய துண்டு
பூண்டு பல் - 6
வெங்காயம் - 200 கிராம்
தேங்காய் துருவல் - 4 டேபிள்ஸ்பூன்
முந்திரி பருப்பு -8
மிளகாய்த்தூள் - ஒன்றரை டீஸ்பூன்
கரம் மசாலா - அரைடீஸ்பூன்
பச்சை மிளகாய் - 2
மல்லித்தூள் -3 டீஸ்பூன்
மிளகுத்தூள் - அரைடீஸ்பூன்
மஞ்சள்தூள் - அரைடீஸ்பூன்
சீரகம் - 1 டீஸ்பூன்
பெருஞ்சீரகம் - 1 டீஸ்பூன்
எண்ணெய் - 100 மில்லி
மல்லி கருவேப்பிலை - சிறிது
உப்பு - தேவைக்கு

செய்முறை: ஒரு பாத்திரத்தில் நன்கு சுத்தம் செய்த நண்டை போட்டு இரண்டு டம்ளர் தண்ணீர் விட்டு, உப்பு சிறிது,அரைஸ்பூன் மஞ்சள் தூள் போட்டு பத்து நிமிடம் வேக வைக்கவும். மிக்ஸியில் தேங்காய், முந்திரி, பச்சை மிளகாய், மல்லி இலை, சீரகம், சோம்பு போட்டு அரைத்து எடுக்கவும்.

இஞ்சி பூண்டை நன்கு தட்டி வைக்கவும்.ஒரு வாணலியில் எண்ணெய் விட்டு காய்ந்ததும் கருவேப்பிலை போடவும்,பின்பு நறுக்கிய வெங்காயம் சேர்த்து வதக்கவும்.பின்பு வதங்கிய வெங்காயத்துடன் இஞ்சி பூண்டு கரம் மசாலா போட்டு வதக்கவும். மேலும் இதனுடன் நறுக்கிய தக்காளி சேர்க்கவும்,நன்றாக மசிந்ததும், மிளகாய்த்தூள், மல்லித்தூள் சேர்க்கவும்,பிரட்டி சிறிது தண்ணீர் தெளித்து மூடி விடவும்.மசாலா வாடை போனதும் வேகவைத்த நண்டை சேர்க்கவும்.

நன்கு மசாலா படும்படி பிரட்டவும். அரைத்த தேங்காய் விழுது சேர்த்து ஒரு கப் தண்ணீர் விடவும்.கெட்டியாக இருந்தால் மீண்டும் பாதி கப் தண்ணீர் சேர்த்து நன்கு பிரட்டி கொதித்து வற்றி வரும்.தேங்காய் வாடை மடங்கியதும் மிளகுத்தூள் சேர்த்து பிரட்டி இறக்கவும். அருமையான ருசியில் நண்டு கிரேவி ரெடி.