அசத்தல் சுவையில் முட்டை குருமா செய்வது எப்படி?

சப்பாத்தி, தோசை, இட்லி, நாண், இடியாப்பம் போன்ற உணவுகளுக்கு தொட்டுக்கொள்ள அருமையாக இருக்கும் முட்டை குருமா ரெசிபியை செய்வது எப்படி என்று பார்க்கலாம்.

தேவையான பொருட்கள்
முட்டை - 5
இஞ்சி, பூண்டு விழுது - சிறிதளவு
தக்காளி - 1
பெ.வெங்காயம் - 1
பச்சை மிளகாய் - 4
சோம்பு, கிராம்பு, கசகசா - சிறிதளவு
தேங்காய் துருவல் - கால் கப்
மஞ்சள் தூள், மிளகாய் தூள் - சிறிதளவு
சாம்பார் பொடி - சிறிதளவு
கொத்தமல்லி - சிறிதளவு
எண்ணெய், உப்பு - தேவைக்கு

செய்முறை
தக்காளி, வெங்காயம், கொத்தமல்லி, ப.மிளகாயை பொடியாக நறுக்கி கொள்ளவும். முட்டையை வேக வைத்துக்கொள்ளுங்கள். சோம்பு, கிராம்பு , கசகசா, தேங்காய் துருவல் போன்றவற்றை மிக்சியில் விழுதாக அரைத்துக்கொள்ளுங்கள். வாணலியில் எண்ணெய் ஊற்றி அது சூடானதும் வெங்காயத்தை போட்டு நன்றாக வதக்கவும். வெங்காயம் நன்றாக வதங்கியதும் இஞ்சி, பூண்டு விழுது, உப்பு சேர்த்து வதக்கவும். இஞ்சி பூண்டு விழுது பச்சை வாசனை போனவுடன் தக்காளி சேர்த்து வதக்கவும்.

தக்காளி குழைய வதங்கியதும் மிளகாய் தூள், சாம்பார்பொடி, மஞ்சள் தூள் சேர்த்து வதக்கி, போதுமான அளவு தண்ணீர் ஊற்றி கொதிக்கவிடுங்கள். நன்கு கொதிக்க தொடங்கியதும் வேகவைத்த முட்டைகளை துண்டுகளாக நறுக்கி போட்டு உடையாத அளவுக்கு லேசாக கிளறிவிடுங்கள். அதனுடன் மிக்சியில் அரைத்துவைத்துள்ள மசாலா கலவையை கொட்டி கிளறுங்கள். நன்கு வெந்ததும் கொத்தமல்லி தழை தூவி இறக்கி பரிமாறலாம். சூப்பரான முட்டை குருமா தயார்.